Wissenschaftliche Mitarbeiterin III, als Leiterin Marketing & Kommunikation
Ensemen per ina societad senza violenza
Orange Days 2025
La fin da november mettan citads ed instituziuns en 187 pajais in accent cunter la violenza cunter dunnas e cunter la violenza a chasa. Era la SAP dal Grischun sa participescha a l’acziun internaziunala e lascha resplender ses edifizi ensemen cun auters edifizis da Cuira en ina glisch oranscha.
Ensemen per ina societad senza violenza
Dals 25 da november, il Di internaziunal cunter la violenza cunter dunnas, fin ils 10 da december, il Di internaziunal dals dretgs umans, stat il Grischun sut l’ensaina d’ina societad senza violenza. Il tema central da quest onn è «violenza sexista ed impediment». El mussa tge mesiras ch’èn necessarias per impedir violenza e per sustegnair da maniera effectiva las persunas pertutgadas. Violenza specifica per la schlattaina cumpara en differentas furmas – da violenza psichica ed economica fin a maltractaments corporals, violenza sexualisada e femicidis.
Cuira metta in signal visibel
L’acziun a Cuira vegn accumpagnada tranter auter da stans d’infurmaziun e da l’illuminaziun da numerus edifizis publics e monuments caracteristics. La glisch oranscha duai augmentar la visibilitad dal tema e dar in cler signal: la violenza na dastga betg vegnir ignorada u taschentada.
16 dis cunter la violenza: in moviment global
Cun sias occurrenzas multifaras gida la campagna internaziunala «16 dis cunter la violenza cunter dunnas e la violenza a chasa» a guardar pli precis ed a cumbatter la violenza specifica per la schlattaina. Cun las activitads a Cuira contribueschan las persunas participadas da sensibilisar, da prevegnir e da cumbatter cunter la violenza a chasa. Las acziuns vegnan sustegnidas dal chantun Grischun e da la citad da Cuira.
Orange Days: render conscient, proteger, rinforzar
Ils Orange Days porschan ina plattafurma per s’infurmar, sa sensibilisar e sa barattar. Els sa drizzan a persunas pertutgadas sco a persunas ch’observan u supponan violenza. La finamira è da rumper il taschair e da rinforzar la conscienza sociala da maniera persistenta.
Cuira resplenda en oransch
Davent da mardi, ils 25 da november, a partir da las 17.00 uras vegnan illuminads cun oransch differents monuments caracteristics ed edifizis da la citad da Cuira: la Scola auta da pedagogia dal Grischun, la staziun da l’auto da posta, la biblioteca da la citad, la Biblioteca chantunala, il Museum retic, il Museum d’art dal Grischun, il curtin Villa Planta, il curtin da l’edifizi da l’administraziun da la Viafier Retica, il teater Cuira, la Banca Chantunala Grischuna, il center administrativ Sinergia, la chasa da scola Quader, la Scola chantunala grischuna, la Scola auta spezialisada dal Grischun en la Pulvermühlestrasse, la Scola professiunala artisanala Cuira, la libraria Schuler, il Merz en la via da la staziun
Contact