Rapports annuals.
Qua chattais Vus tut ils rapports annuals electronics da la SAPGR en successiun cronologica. Per cas che Vus n’avais betg chattà in rapport annual, ans contactai per plaschair.
ulteriuras infurmaziuns
Online
Il rapport da l'onn 2023
Il nov rapport da gestiun da la SAP dal Grischun è qua. La scola auta da pedagogia preschenta in resultat annual equilibrà e guarda enavos sin in onn da giubileum plain muments da success e sfidas.
La Scola auta da pedagogia dal Grischun fa l’onn da gestiun 2023 ina svieuta da totalmain 25.9 milliuns francs. I resulta in pitschen surpli dal retgav en la dimensiun da 23’580.23 francs ed uschè è il resultat annual positiv. L'augment da 12% dal dumber da studentas e students en cumparegliaziun cun l'onn passà e las contribuziuns interchantunalas e chantunalas han contribuì a quest resultat positiv (incl. credit posteriur)
Il 2023 - in onn sut l'einsaina dal creschament
197 studentas e students han cumenzà l'atun lur studi a la SAP dal Grischun. Quai èn tantas persunas sco anc mai e mussa che la tendenza a l'augment en connex cun las novas entradas cuntinuescha.
Cun totalmain 516 studentas e students ha la SAP dal Grischun surpassà per l'emprima giada la limita da 500 ed avanza uschia en il sectur da las scolas autas da pedagogia mesaunas. Il dumber da studentas e students è uschia s'augmentà entaifer paucs onns per bundant 50 pertschient.
En quest dumber n'èn betg inclusas las 14 persunas da la SAP da Son Gagl che frequentan il studi sec I per persunas d'instrucziun dal stgalim primar sco era las 24 persunas ch'èn s'inscrittas per il studi da pedagogia curativa da scola a la scola auta per pedagogia curativa da Turitg. Omadus studis vegnan manads atras cumplettamain u per gronda part a Cuira.
20 onns SAP dal Grischun
«Nagin n'avess pensà avant 20 onns ch'uschè in svilup fiss pussaivel. La purschida da studi - sviluppada vinavant ed amplifitgada - che nus purschain dapi il 2022 è in punct central da quest svilup legraivel. Ella gida da mitigiar la situaziun precara en connex cun la mancanza da persunas d'instrucziun en il chantun Grischun», di il rectur Gian-Paolo Curcio. Ils 20 d'october 2003 han 59 studentas e students cumenzà per l'emprima giada lur studi a la scola auta professiunala da pedagogia. Dapi lura promova e caracterisescha la scola auta da pedagogia a moda singulara l'instrucziun e la lavur da las persunas d'instrucziun dal chantun Grischun.
La SAP dal Grischun actuala è accreditada instituziunalmain, ses studis èn renconuschids, sias purschidas da la furmaziun cuntinuada resguardan ils basegns multifars da las scolas, ils resultats da la scienza survegnan attenziun naziunala ed internaziunala. Ella nizzegia la midada digitala e sa sviluppa cuntinuadamain vinavant sco scola auta moderna. Oz scolescha la SAP dal Grischun a Cuira studentas e students en tudestg, talian e rumantsch ed è uschia l'unica scola auta trilingua en la cuntrada da furmaziun da la Svizra.
Il giubileum da 20 onns stat en il center dal rapport annual da quest onn. Persunalitads da la scienza, da l'economia e da la politica da furmaziun descrivan differents aspects da la furmaziun da las persunas d'instrucziun e mussan co che la SAP dal Grischun vegn percepida en la publicitad.
La scola auta preschenta in resultat equilibrà
La Scola auta da pedagogia dal Grischun fa l’onn da gestiun 2023 ina svieuta da totalmain 25.9 milliuns francs. Ella preschenta in pitschen surpli dal retgav en la dimensiun da 23’580.23 francs ed uschia in resultat annual equilibrà.
L’augment dal retgav po vegnir attribuì principalmain a dus facturs. Sco emprim a las entradas supplementaras or da la cunvegnientscha cun la scola auta professiunala sin basa da l'augment dal dumber da studentas e students, sco segund a l'augment da la contribuziun chantunala en dus pass. L'emprim augment è gia vegnì surdà cun il preventiv 2024 sin basa dal dumber da las studentas e dals students ch'era vegnì prognostitgà pli aut. Las novas entradas per il semester d'atun han surpassà las aspectativas, uschia ch'ins ha stuì dumandar in ulteriur augment da la contribuziun chantunala per cuvrir ils custs supplementars.
Il retgav stat visavi a custs da 25.9 milliuns francs. En cumparegliaziun cun il preventiv èn ils custs ca. 1.6 milliuns francs pli auts. Ils custs supplementars pon vegnir attribuids cunzunt als custs da persunal augmentads en consequenza dal dumber da studentas e students ch'è creschì. La scola auta da pedagogia n'ha dentant betg stuì s'adattar sulettamain a las pretensiuns creschidas areguard il persunal e l'infrastructura. Era l'organisaziun da 620 plazs da praticum è stada ina nova sfida.
Il rapport annual
Il rapport annual è da chattar qua:
https://jahresberichte.phgr.ch
Contact
