La Scola auta da pedagogia ha definì sia visiun 2036. Tge è l'essenza?
A la fin dals quints vai per auta qualitad ed avunda quantitad. Il chantun Grischun dovra davent da la scolina fin al stgalim secundar II avunda persunas d'instrucziun, en tut las linguas chantunalas, che lavuran a moda professiunala. Nossa purschida attractiva ha exact quest focus. La qualitad da la SAP dad oz sa mussa en la qualitad da la scola populara da damaun.
Tge finamira ha la Scola auta da pedagogia en sia strategia 2025-2028?
Gugent punctuesch jau trais aspects centrals: En il project «emprender29» vulain nus drizzar il studi dapli sin l'emprender per ch'ils students e las studentas studegian anc pli fitg a moda autonoma, activada e relevanta per la professiun. En il project da construcziun preparain nus en quest decenni, ensemen cun il chantun, in edifizi d'engrondiment e la sanaziun centrala da noss campus ch'è degn da vegnir protegì; nus duvrain locals persistents che sustegnan l'emprender modern. En terza lingia vulain nus consolidar la purschida ch'è vegnida engrondida fermamain ils davos onns, stabilisar il dumber da studentas e students e sviluppar vinavant la qualitad.
La mancanza da persunas d'instrucziun è in problem urgent en Svizra. Tge ideas avais Vus per cuvrir il basegn da persunas d'instrucziun cun ina buna furmaziun en il Grischun ed er ordvart il chantun?
Nossa purschida sto esser qualitativamain pretensiusa ed attractiva per studentas e students. Quai na sa cuntradi betg. Jau sun persvas ch'ina scolaziun pretensiusa na starmenta betg, mabain è attractiva. Esser persuna d'instrucziun è forsa la pli bella professiun dal mund - dentant be sch'ins dumogna la professiun. La pretensiun d'auzar il dumber da persunas d'instrucziun na dastga betg ans surmanar da sbassar la qualitad da la furmaziun.
Tge sfidas spetgan la SAP dal Grischun ils proxims onns?
Ina gronda sfida è la mancanza da spezialistas e da spezialists. Nus duvrain per exempel bunas docentas e buns docents che han bler experientscha en la scola primara, che disponan d'in diplom da scola auta per il rom relevant e che san ultra da quai, sche pussaivel, er instruir per rumantsch e talian. Quai n'è betg simpel. La qualitad da la Scola auta da pedagogia dependa directamain da la qualitad da nossas collavuraturas e noss collavuraturs. Perquai investin nus intensivamain en lur scolaziun e furmaziun cuntinuada.
L'emprender individualisà e novs concepts didactics vegnan a survegnir en il futur dapli impurtanza. Co vegnan quests svilups a midar la furmaziun da las persunas d'instrucziun?
La scola populara è naschida durant il 19avel tschientaner e vegniva organisada sco ina fabrica: classas d'annada, retschas, roms, lecziuns da 45 minutas ed examens. Bler da quai n'avain nus betg pli oz: Ina bun'instrucziun pretenda e promova ils singuls uffants sin lur nivel. Scienza natirala è era matematica; matematica è er instrucziun da lingua. Ils uffants scuvran las tematicas a moda ludica, construeschan lur atgnas vias a la soluziun, lavuran sulets, en ina gruppa u en il plenum. Questa individualisaziun vegn a crescher, perquai che uffants ch'emprendan èn uffants activs.
Tge rolla ha l'intelligenza artifiziala?
L'intelligenza artifiziala ha in immens potenzial per l'emprender a moda individualisada. Ins po instruir in'intelligenza artifiziala: sajas mes coach, m'explitgescha il suandant pensum; m'explitgescha quai auter; m'explitgescha quai pli plaun; fa per mai in pensum tar la suandanta finamira d'emprender; fa per mai in test d'emprova tar quest chapitel; ma dà resuns stilistics! L'intelligenza artifiziala na dastga betg surpigliar lavur - l'intelligenza artifiziala sto sustegnair l'acquist da cumpetenzas. E l'intelligenza artifiziala na remplazza ni la persuna d'instrucziun ni l'emprender en la gruppa.
La strategia accentuescha era l'impurtanza d'enconuschientschas fundadas en connex cun l'efficacitad da la furmaziun da las persunas d'instrucziun. Tge vul quai dir concretamain?
La scienza è ina pitga centrala da la furmaziun da persunas d'instrucziun. Per exempel è vegnì perscrutà l'effect da feedback concret, d'evaluaziuns formativas e d'ina sauna relaziun tranter uffant e persuna d'instrucziun - quai gioga ina rolla centrala en l'instrucziun. Per quest motiv èsi mo consequent che nus evaluain era l'efficacitad da la furmaziun da persunas d'instrucziun a moda scientifica.
Co vulais Vus promover la strategia en Vossa rolla sco rectur?
Ina cultura da scola auta ma giascha a cor. Impurtant èsi che las cumpetenzas da nossas collavuraturas e noss collavuraturs sa manifesteschian, ch'ellas ed els possian contribuir lur impuls ed ideas e che nossa scola auta vivia. Per che nus hajan in effect positiv sin nossa scola populara da l'avegnir e sin l'entira societad.
