Sonda, ils 29 da november han la Scola auta da pedagogia dal Grischun, la Scola auta spezialisada dal Grischun e la EMS Schiers organisà la 18avla concurrenza regiunala da la First Lego League (FLL). Dudesch teams da challenge e set teams d’explore cun totalmain 120 uffants e giuvenils èn sa participads. Els han perscrutà e ponderà davart il tema da la stagiun cun il titel «Unearthed». En la categoria challenge ha il team Electronic Machines Schiers 2.0 gudagnà il titel total.
La damaun baud èn ils teams da Cuira, Landquart, Schiers, Tavau e Domat da la categoria challenge arrivads a la Scola auta da pedagogia a Cuira. Suenter il bainvegni dal rectur da la SAP dal Grischun prof. dr. Reto Givel-Bernhard, han ils giuvenils da 9 fin 16 onns cumenzà cun la prerunda dals Robot-Games.
Entaifer 2 minutas e mez han ils roboters – construids e programmads sezs da las equipas – stuì schliar las incumbensas prescrittas. Per mintga incumbensa reussida han els survegnì puncts custaivels. Tgi che ha gì ina partenza difficila è sa retratg tranter las rundas ed ha optimà la programmaziun da ses roboter. Ils quatter teams cun il pli aut dumber da puncts da la prerunda han cuntanschì il mezfinal. En il final è sa mess tras il team Electronic Machines Schiers da la EMS Schiers. El ha gudagnà il pocal dals Robot-Games avant ils Capricorns ed ils Electronic Machines Schiers 2.0.
Tranter ils Robot-Games han ils teams preschentà lur projects da perscrutaziun. Durant las emnas avant la concurrenza han ils teams discurrì cun expertas ed experts, han fatg retschertgas e dumandà differentas persunas davart lur dumonda da perscrutaziun. Els han elavurà soluziuns creativas davart il tema da la stagiun «Unearthed». Il Team Capricorns Junior da la Scola chantunala Cuira ha persvadì la giuria ed ha survegnì il pocal per la meglra preschentaziun da perscrutaziun.
Il pocal per il meglier design da roboter è ì al team Capricorns da la Scola chantunala Cuira. Il team Sapphire da la SAP dal Grischun ha mussà ina ferma lavur da team ed ha survegnì la distincziun per valurs da basa vividas.
Il pocal da champion per il meglier resultat total da tut las categorias ha gudagnà il team Electronic Machines Schiers 2.0. Ils Capricorns èn vegnids sin il segund rang, ils Capricorns Junior èn vegnids terzs. Tut ils trais teams èn sa qualifitgads per il campiunadi svizzer ils 21 da favrer 2026 a Moutier.
En la categoria Explore han uffants da 6 fin 10 onns construì e programmà agens models. Tschintg teams da la promoziun da talents e da persunas talentadas Cuira e mintgamai in team da Zug e Schmerikon han mussà lur lavurs. Numerusas visitadras e numerus visitaders han admirà las construcziuns creativas. La giuria ha premià tut ils teams da questa categoria per lur participaziun.
En il program accumpagnant èn ils uffants directamain stads al puls da la tecnica. Ils sponsurs principals Ems-Chemie, Georg Fischer, Hamilton Bonaduz e Trumpf Schweiz han construì cun ils uffants detecturs da metal ed han lura laschà tschertgar els pitschens stgazis. Studentas e students da la SAP dal Grischun han manà workshops ed accumpagnà uffants en lur emprims pass da programmaziun.
La concurrenza rinforza il pensar tecnic e promova la lavur en in team. Ella collia scolas, scolas autas, manaschis innovativs e famiglias e mussa co ch'uffants sviluppan soluziuns, partan savida e perscruteschan cun plaschair.
Nus engraziain a noss sponsurs, a tut las gidantras ed a tut ils gidanters, al team da giuria, al team dals arbiters ed a tut las persunas participadas per lur sustegn. Cordiala gratulaziun a tut ils teams per lur prestaziuns! Als trais teams qualifitgads giavischain nus bun success per il campiunadi svizzer.
La First Lego League (FLL) è in program internaziunal per promover MINT che vegn sustegnì dapi l'onn 2008 da la SAP dal Grischun, da la SAS dal Grischun e da la EMS Schiers. Il program da promoziun ha la finamira d’entusiasmar uffants e giuvenils en in’atmosfera sportiva per la scienza e la tecnologia e d'als facilitar l’access a roms da las scienzas natiralas. Cun il program duain els sviluppar a temp in interess per professiuns d’inschigner u d’IT.
La FLL promova il spiert da team ed intimescha ils uffants ed ils giuvenils da chattar soluziuns creativas per incumbensas cumplexas. En quest connex vegn integrà il mund da viver dals uffants e promovì co ch'ils uffants san ir enturn cun sbagls ed i vegn promovì lur pensar analitic e perscrutant.
En il rom dal program construeschan scolaras e scolars da 9 fin 16 onns en la categoria da la Challenge League in roboter cumplettamain automatic per l’uschenumnà «Robot-Game», nua ch’els han da schliar entaifer 150 secundas pliras incumbensas sin ina plazza da giugar fixada. Il di da la concurrenza preschentan els lur lavur, lur ideas e lur abilitad da lavurar en in team davant ina giuria en las categorias «Valurs da basa, preschentaziun da la perscrutaziun e design dal roboter».
Cun la promoziun da MINT prenda la Scola auta da pedagogia dal Grischun en mira che persunas d’instrucziun futuras sco era talas cun experientscha enconuschan las novas tecnologias, las san applitgar ed utilisar en l’instrucziun. Las scolastas ed ils scolasts vegnan entusiasmads per cuntegns da MINT ed acquistan abilitads da promover questas cumpetenzas da lur scolaras e scolars.
ulteriuras infurmaziuns
Wissenschaftliche Mitarbeiterin III, als Leiterin Marketing & Kommunikation
Ihr Browser (IE 11) ist leider zu alt und wird nicht mehr unterstützt.