La fin da matg è stà l’ultim termin d’annunzia per ils studis da bachelor e da master a la Scola auta da pedagogia dal Grischun. Cumpareglià cun l’onn precedent s’augmentan las annunzias per trais pertschient. Cun 196 annunzias ha la scola auta cuntanschì il segund aut dumber d’annunzias da sia istorgia.
Il studi Scola primara (1. fin 6. classa) resta a la testa cun 132 annunzias (2024: 132). Mintga quarta persuna vegn ad absolver il studi per rumantsch u per talian. I dat en egl che la part da studentas e da students a temp parzial da quest studi s’augmenta vinavant: 16 novas annunzias (2024: 10). L’interess per il studi da bachelor Scolina e scola primara (1. – 2. classa) resta stabil cun 36 annunzias (2024: 36). Var 40 pertschient da las studentas e dals students vegnan ad absolver quest studi per rumantsch u per talian.
Interessant è er il sguard sin la statistica da derivanza. Tar il studi Scolina e scola primara (1. – 2. classa) abitescha la maioritad da las interessentas e dals interessents ordaifer il chantun Grischun. Tar il studi Scola primara (1. – 6. classa) èsi circa la mesadad. Las studentas ed ils students che sa decidan da far in studi a la SAP dal Grischun vegnan oravant tut dals chantuns Son Gagl e Tessin.
Il studi da master Stgalim secundar I ed il studi cumbinà Stgalim secundar I / scolas da maturitad han puspè pudì carmalar dapli interessentas ed interessents. Cun 28 annunzias cuntanschan quests studis in nov record (2024: 23). Ils dus studis sa drizzan a persunas cun in diplom universitar en in rom d’instrucziun sco matematica, tudestg u talian, ma er en ina scienza natirala, en sport u en art figurativ. En il studi da master vegnan enconuschientschas dal rom cumplettadas cun cumpetenzas da la didactica dal rom e da la pedagogia e cun experientschas sistematicas en la pratica professiunala.
En las 196 immatriculaziuns novas n'èn anc betg resguardadas las annunzias per ils studis da master en cooperaziun cun autras scolas autas. En il studi da master Pedagogia curativa da scola, che la SAP dal Grischun porscha ensemen cun la Scola auta interchantunala per pedagogia curativa Turitg (HfH), è il dumber d’annunzias s’augmentà per 25 pertschient sin 34 (2024: 27). Il studi da master Svilup da la scola, che vegn purschì ensemen cun differents partenaris da cooperaziun, è gia stà cumplet l’october 2024 cun 34 studentas e students.
Il rectur Reto Givel-Bernhard è cuntent: «Jau hai grond plaschair che tantas persunas giuvnas èn sa decididas per la professiun da scolasta u scolast. A partir dal settember studegian var 650 studentas e students a la SAP dal Grischun. Quai è in nov record. Quai ha da far tant cun l’attractivitad da questa professiun sco era cun l’attractivitad da nossa purschida da studis. Igl è legraivel ch’era nossas scolaziuns da CAS èn quasi tuttas cumplettas. La gronda dumonda mussa quant impurtanta che la furmaziun supplementara è per bleras persunas d’instrucziun.»
Remartga: Il dumber spetgà da studentas e students po sa midar fin al cumenzament dal studi. Quai po capitar, sche las cundiziuns d’admissiun n’èn betg ademplidas il mument dal termin d’annunzia e/u sch’igl ha dà pliras annunzias per differentas scolas autas.
Vulais Vus promover ed accumpagnar uffants da la scolina fin en la 2. classa? Sco persuna d’instrucziun gidais Vus ils uffants da sa sviluppar tenor lur preferenzas. A la Scola auta da pedagogia dal Grischun emprendais Vus co elavurar cuntegns da maniera didactica e co stgaffir in’atmosfera positiva en stanza da scola.
ulteriuras infurmaziuns
Sco scolast/a dal stgalim primar instruis Vus uffants da l’emprima fin sisavla classa. Vus stgaffis chaschuns d’emprender cun las qualas las scolaras ed ils scolars pon sa sviluppar da maniera optimala. La Scola auta da pedagogia As prepara sin l’instrucziun en tut ils roms dal plan d’instrucziun e pussibilitescha d’applitgar models teoretics da maniera pratica.
ulteriuras infurmaziuns
Sco scolast:a sin il stgalim secundar I preparais Vus giuvenils per lur futur. Questa professiun pretensiusa cuntanschais Vus cun in studi da trais onns a temp parzial a la Scola auta da pedagogia. In program variant cun ina gronda cumpart da didactica dal rom e da pratica professiunala As spetga. La furmaziun è fitg individualisada ed As qualifitgescha d’instruir en ina scola reala u secundara.
ulteriuras infurmaziuns
Sco scolast:a sin il stgalim secundar I e scolas da maturitad preparais Vus giuvenils per lur futur. Questa professiun pretensiusa cuntanschais Vus cun in studi da trais onns a temp parzial a la Scola auta da pedagogia. In program variant cun ina gronda cumpart da didactica dal rom e da pratica professiunala As spetga. La furmaziun è fitg individualisada ed As qualifitgescha d’instruir en ina scola reala u secundara sco er en scolas da maturitad.
ulteriuras infurmaziuns
Pedagogas e pedagogs curativs da scola instrueschan, accumpognan e promovan scolaras e scolars cun basegns da furmaziun spezials. En quest connex collavuran els stretgamain cun persunas d’instrucziun, cun expertas ed experts e cun geniturs. Il studi da master collia svilups actuals da la pratica cun enconuschientschas scientificas.
ulteriuras infurmaziuns
Midadas socialas influenzeschan las scolas ed èn ina sfida per ellas. Sco sviluppadra/sviluppader da la scola participais Vus da maniera activa d’iniziar pass da svilup e da definir novs process. Il studi da master Svilup da la scola en cooperaziun cun autras scolas autas As qualifitgescha sco expertas ed experts dal svilup da la scola sin nivel naziunal ed internaziunal.
ulteriuras infurmaziuns
Erleben Sie die ganze Welt der PH Graubünden. Mit unserem E-Newsletter informieren wir Sie regelmässig über aktuelle Bildungsthemen, Neuigkeiten, Veranstaltungen, Messen, Kurse, Lehrgänge und vieles mehr. Melden Sie sich jetzt an.
ulteriuras infurmaziunsIhr Browser (IE 11) ist leider zu alt und wird nicht mehr unterstützt.