Di da l’avegnir: Matematica è dapli che mo quintar

«Entaifer curt temp è noss di da l’avegnir puspè stà occupà», sa legra Lilian Ladner, manadra dal project per il di da l’avegnir a la Scola auta da pedagogia dal Grischun. «Gia dapi quattordesch onns purschain nus mintgamai in program per mats (5avla e 6avla classa). Quest onn per l’emprima giada era per mattas. Igl ha fatg la runda che quest di è per tut las participantas e tut ils participants tant ina pitschna aventura sco er in grond gudogn.» Ils 14 da november 2024 èsi puspè stà uschè lunsch: 25 scolaras e scolars da la tschintgavla e sisavla classa èn s’entupads l’avantmezdi a la SAP dal Grischun cun otg studentas e students, ils dus docents e la manadra dal project. Suenter il bainvegni, ina runda d’emprender d’enconuscher in l’auter ed ina curta introducziun tras la manadra dal project dunna Lilian Ladner e ses team, èn las persunas d’instrucziun giuvnas s’occupadas da dumondas en connex la professiun da la persuna d’instrucziun: Tge è caracteristic per ina buna persuna d’instrucziun, co vesa ora ses mintgadi, tge èn las sfidas las pli grondas, co pon ins daventar persuna d’instrucziun etc.? Suenter èsi stà da preparar la lecziun ch’ils uffants han lura tegnì il suentermezdi tar scolaras e scolars da la segunda e terza classa da la scola da la citad da Cuira.

La damaun studenta/student, il suentermezdi persuna d’instrucziun da la scola primara

Quest onn è il di da l’avegnir stà sut l’ensaina da la matematica, pia da la scienza dals musters e da las structuras. Da maniera captivanta han las mattas ed ils mats intermedià a las scolaras ed als scolars da la segunda e terza classa cun agid d’in gieu da cubus che la matematica è dapli che mo «quintar». Cun savair e savair far han els preschentà il suentermezdi strategias a las scolaras ed als scolars e barattà experientschas. Els als han mussà che la matematica ans po sustegnair da chapir meglier il princip da casualitad. Dapli na tradescha Lilian Ladner, ensemen cun Dominik Jörg e Pascal Lütscher (omadus docents da didactica dal rom matematica), betg. Ella accentuescha dentant ch’i giaja per dapli a quest di naziunal da l’avegnir: «Per nus èsi impurtant ch’ils giuvenils survegnian invista en la professiun interessanta da la persuna d’instrucziun e ch’els possian emprender d’enconuscher in pau il studi a la SAP dal Grischun ed entrar en contact cun las persunas d’instrucziun futuras. Els emprendan da nossas studentas e da noss students co ch’els pon entusiasmar ils uffants en l’instrucziun. Els planiseschan l’instrucziun fin en ils detagls per che tut gartegia e tranter auter era per resguardar la ritmisaziun. Els emprendan trics per furmar gruppas, controlleschan il material necessari, emprendan da resguardar il management dal temp e termineschan la lecziun cun dumandar in feedback – pia sco ina vaira persuna d'instrucziun.»