Sonda, ils 29 da november 2025 a partir da las 8.50 uras vegn la Scola auta da pedagogia dal Grischun a Cuira animada d’in spiert d’exploraziun e d’innovaziun. En collavuraziun cun la Scola auta spezialisada dal Grischun e cun la EMS Schiers realisescha ella la concurrenza regiunala First Lego League. Var 130 participantas e participants vegnan spetgads.
Perscrutar, bajegiar, programmar: First Lego League a Cuira
Sonda, ils 29 da november 2025 a partir da las 8.50 uras vegn la Scola auta da pedagogia dal Grischun a Cuira animada d’in spiert d’exploraziun e d’innovaziun. En collavuraziun cun la Scola auta spezialisada dal Grischun e cun la EMS Schiers realisescha ella la concurrenza regiunala First Lego League. Var 130 participantas e participants vegnan spetgads.
Archeologia scuntra sin auta tecnologia
Cun il nov tema da la stagiun «unearthed» sa schluitan uffants e giuvenils da 6 fin 16 onns en la rolla d’archeologas e d’archeologs. Els perscruteschan lieus d’exchavaziun, chattan artefacts sensibels e reconstrueschan connexs istorics cun agid da tecnologias modernas.
Concurrenza interessanta
Curt suenter las 9 cumenzan las concurrenzas da la Challenge League (participantas e participants tranter 9 e 16 onns): Qua sa mesiran ils teams en il Robot-Game e cun lur project da perscrutaziun. Tar il Robot-Game vala mintga gest: En 2,5 minutas ston ils teams dumagnar missiun per missiun cun lur roboters da Lego construids sezs e programmads. Els cumprovan abilitad ed intelligenza e mussan co ch'els lavuran ensemen. In highlight spezial da la concurrenza èn ils gieus da mezfinal e final. Els cumenzan curt suenter las 14.30 en l'aula da la SAP dal Grischun.
Ultra da quai èn ils teams sa fatschentads cun ina dumonda da perscrutaziun davart il tema da la stagiun "unearthed" . Sco vairas scienziadas e scienziads han els retschertgà, discutà cun expertas ed experts ed elavurà soluziuns concretas. Lur project da perscrutaziun e lur design da roboter preschentan ils teams il di da la concurrenza davant ina giuria. Teams da l'Explore League cun uffants da 6 fin 10 onns preschentan il suentermezdi al plaunterren ils models originals da lur lavur da perscrutaziun.
Sa participar e smirvegliar
En il foyer porschan ils sponsurs principals da la EMS-Chemie, Georg Fischer, Hamilton Bonaduz e Trumpf Schweiz staziuns interactivas e dattan invista en lur munds tecnics ed innovativs.
Refrestgs datti en il restaurant Scaläratreff.
Finiziun culminanta
Il di finescha a las 15:40 cun ina premiaziun festiva en l’aula. Qua vegnan premiads ils megliers teams da l'Explore e Challenge League.
L’occurrenza publica empermetta projects da roboter impressiunants, soluziuns captivantas ed inscunters enritgints per pitschen e grond. Visitai la concurrenza regiunala ils 29 da november 2025 a Cuira e laschai inspirar da l’entusiassem per robotica.
La First Lego League (FLL) è in program da promoziun MINT internaziunal che vegn sustegnì dapi l’onn 2008 da la SAP dal Grischun, da la SAS dal Grischun e da la EMS Schiers. Il program da promoziun ha la finamira d’entusiasmar uffants e giuvenils en in’atmosfera sportiva per la scienza e la tecnologia ed als facilitar l’access a roms da las scienzas natiralas. Cun il program duain els survegnir la pussaivladad da sviluppar in interess per professiuns d’inschignier e d’IT.
La FLL promova il spiert da team ed intimescha ils uffants ed ils giuvenils da chattar soluziuns creativas per incumbensas cumplexas. Ella integrescha l’ambient da viver dals uffants ed als dat curaschi d’emprender da sbagls e da pensar a moda analitica.
En il rom dal program construeschan scolaras e scolars da 9 fin 16 onns en la categoria da la Challenge League in roboter cumplettamain automatic per l'uschenumnà «Robot-Game», nua ch'els ston schliar entaifer 150 secundas pliras incumbensas sin in champ da giugar predefinì. Il di da la concurrenza preschentan els lur lavur, lur ideas e lur abilitad da lavurar en in team davant ina giuria en las categorias «Valurs da basa, preschentaziun da la perscrutaziun e design dal roboter».
Vivai l'entir mund da la SAP dal Grischun. Cun noss e-newsletter As infurmain nus regularmain davart temas actuals da la furmaziun, novitads, occurrenzas, fieras, curs, studis e bler dapli. As annunziai uss.
ulteriuras infurmaziuns
ulteriuras infurmaziuns
Ihr Browser (IE 11) ist leider zu alt und wird nicht mehr unterstützt.