Communicaziun a las medias
Vacanzas ina giada auter: construir roboters u scriver istorgias

Construir roboters, chattar ora codes, inventar atgnas istorgias – e quai durant las vacanzas da stad? Gist quai spetga uffants e giuvenils a la Scola auta da pedagogia dal Grischun. Dals 4 fin ils 7 d’avust 2025 pon scolaras e scolars tscherner tranter duas purschidas variantas: ils-CAMPs GR Kids orientads a la tecnica ed il camp da scriver linguistic-creativ. Omadus programs mettan l’accent sin emprender a moda ludica, sin lavur creativa e sin il plaschair da sviluppar chaussas novas.

i-CAMPs GR Kids: dar vita als roboters

Quatter dis vegnan las stanzas d’instrucziun sin il campus da la scola auta transfurmadas en lavuratoris captivants. Scolaras e scolars da la 3. fin 9. classa programmeschan roboters da LEGO, realiseschan agens projects e sfundran en il mund da las tecnologias digitalas. Ils camps vegnan manads da la professura didactica da matematica da la SAP dal Grischun. “Cun ils i-CAMPs vulain nus vulain nus far gust als uffants e giuvenils da scuvrir las tecnologias futuras datiers da la pratica”, di Parvaneh Babari, manadra dal project i-CAMPs GR Kids e collavuratura scientifica a la SAP dal Grischun. “Nus entusiasmain participantas e participants giuvens per matematica e tecnologias digitalas cun mussar quanta creativitad, mirveglias e pussaivladads captivantas ch’els han.” Il team pledenta spezialmain uffants e giuvenils che n’han fin ussa anc betg fatg experientschas u fatg be paucas experientschas cun robotica u che han anc retegnientschas. Il program da vacanzas promova il plaschair vi dal pensar logic, la lavur en in team ed il curaschi da realisar atgnas ideas.

Camp da scriver: fantasia na dovra naginas reglas

Parallel cun ils i-CAMPs GR Kids ha lieu gia per la terza giada il camp da scriver – per tut quellas e quels che s’expriman gugent cun pleds. En pitschnas gruppas e cun sustegn d’ina autura cun experientscha, scrivan las participantas ed ils participants lur atgnas istorgias. “En il center na stattan betg grammatica u ortografia, mabain la fantasia, la creativitad e la fidanza en l’atgna vusch”, accentuescha Irina Lutz, cunorganisatura e co-manadra dal post da stab per las linguas chantunalas da la SAP dal Grischun. En il camp da scriver emprendan uffants co ch’els sviluppan d’ina idea ina istorgia captivanta – e surtut quant bler plaschair che scriver fa. La scriptura dat impuls creativs, respunda dumondas ed accumpogna ils uffants sin lur viadi d’exploraziun. Ensemen experimenteschan els co che patratgs pon sa furmar tar texts che tutgan il cor u fan rir. 

Ils camps da stad sin in’egliada 


i-CAMPs GR Kids

Cuntegn: Programmar, construir, experimentar – cun roboters da LEGO e projects creativs
Cura: Glindesdi, ils 4 fin gievgia, ils 7 d’avust 2025, mintga di 09.00–16.00 uras
Per tgi: Tuttas e tuts che vegnan suenter las vacanzas da stad en la 3.-9. classa
Custs: CHF 360.– (fragliuns CHF 310.–), incl. alimentaziun, accumpagnament da mezdi ed excursiuns
Annunzia: phgr.ch/icamps


Camp da scriver

Cuntegn: Sviluppar istorgias, crear figuras, scuvrir tecnicas da raquintar
Cura: Mardi, ils 5 d’avust: 13.30–17.00 uras, Mesemna, ils 6.d’avust: 09.00–16.00 uras, Gievgia, ils 7 d’avust: 09.00–13.00 uras
Per tgi: Tuttas e tuts che vegnan suenter las vacanzas da stad en la 4.–7 classa
Custs: CHF 160.– (fragliuns CHF 140.–), incl. alimentaziun ed accumpagnament da mezdi 

i-CAMPs GR Kids 2025

Vuls ti savair co ch’il mund digital funcziuna, co ch’ins programmescha, bajegia maschinas e co ch’ins dat alura vita a questas?

ulteriuras infurmaziuns

CAMP da scriver 2025

Has ti il chau plain ideas e vuls crear cun quellas in’istorgia? Has ti gust da scriver, ma na sas betg co cumenzar? Dovras ti in lieu ideal per pudair glimar vi da tia istorgia? Lura es ti tar nus exact en il dretg lieu.

ulteriuras infurmaziuns

Contact

Ihr Browser (IE 11) ist leider zu alt und wird nicht mehr unterstützt.