Durant las vacanzas è marschà bler a la SAP dal Grischun: Dapli che 60 scolaras e scolars èn sfunsads en il mund da las tecnologias digitalas durant ils i-CAMPs; il medem mument han 13 auturas ed auturs sviluppà lur scriver en il camp da scriver.
Dapli che 60 scolaras e scolars èn sa participads als i-CAMPs da quest onn – uschè blers sco anc mai. Els han nizzegià lur vacanzas da stad per augmentar lur cumpetenzas d’informatica e per emprender da schliar problems cumplexs.
En trais differents nivels - tut tenor vegliadetgna ed experientscha – han las scolaras ed ils scolars lavurà cun utensils digitals, han programmà roboters da LEGO, han sviluppà agens projects en han schlià pensums spinus. Docentas e docents da la SAP dal Grischun ed in student da master da la SPF da Turitg han manà ils lavuratoris. Studentas e students da la SAP dal Grischun han accumpagnà ils uffants en las gruppas ed han rimnà experientschas preziusas. «L’atmosfera d’emprender positiva, en la quala las mirveglias e la creativitad èn stadas en il center, n’ha betg sulettamain dà impuls prezius a las participantas ed als participants, mabain er a nus persunas d’accumpagnament. Ils i-CAMPs han mussà a moda impressiunanta tge potenzial che persunas giuvnas pon sviluppar, sch’ellas pon emprender a moda independenta e ludica», di Parvaneh Babari, manadra dal project e collavuratura scientifica a la SAP dal Grischun.
Durant che las participantas ed ils participants dals i-CAMPs han experimentà e programmà, èn 13 uffants en la vegliadetgna da 10 fin 13 onns sfunsads en il mund dals pleds en il camp da scriver. Els èn sa transfurmads en auturas giuvnas ed auturs giuvens – plain creativitad e tschaffen da far novas scuvertas. «En noss mund svelt e digital è scriver sco ina insla da ruaus – in lieu per sa retrair e tancar nova energia», di Irina Lutz, la manadra dal project e la manadra dal post da stab per linguas chantunalas da la SAP dal Grischun. L’autura e versada manadra dal camp da scriver, Patrizia Parolini, sco er ina studenta da la SAP dal Grischun han accumpagnà ils uffants. Cun impuls creativs e bler sensibilitad han ellas sustegnì ils giuvens talents durant il process da scriver. «Per il solit na dovri betg blers cussegls. In ambient inspirant tanscha, per ch’ils uffants survegnian fidanza en lur agen scriver e per che lur istorgias possian crescher», declera Parolini. Il punct culminant è stà ina prelecziun, a la quala èn stads envidads era geniturs e fragliuns. Qua han las participantas ed ils participants preschentà lur ovras: istorgias davart munds magics, animals che discurran, aventuras curaschusas e dapli. Ils texts resplendan gronda imaginaziun ed in vair plaschair da scriver.
Sin basa dal grond success vegnan ils camps da stad era puspè organisads la stad 2026.
Cun la promoziun da MINT prenda la Scola auta da pedagogia dal Grischun en mira che persunas d’instrucziun futuras sco era talas cun experientscha enconuschan las novas tecnologias, las san applitgar ed utilisar en l’instrucziun. Las scolastas ed ils scolasts vegnan entusiasmads per cuntegns da MINT ed acquistan abilitads da promover questas cumpetenzas da lur scolaras e scolars.
ulteriuras infurmaziuns
La professura per didactica da la matematica e la gruppa da lavur MINT s’engaschan per l’instrucziun e la perscrutaziun da matematica ed informatica. Las commembras ed ils commembers da la gruppa sa participeschan a differents moduls da matematica e d’informatica e porschan ultra da quai regularmain furmaziuns supplementaras. La perscrutaziun metta l’accent sin dumondas scientificas actualas davart l’instrucziun e l’emprender cun meds da matematica digitals e davart lieus d’emprender da MINT ordaifer la scola. Quai includa er il svilup e l’examinaziun d’ambients d’emprender digitals per l'instrucziun.
ulteriuras infurmaziuns
Ihr Browser (IE 11) ist leider zu alt und wird nicht mehr unterstützt.