Communicaziun a las medias

Studis da master Stgalim secundar: Renconuschientscha tras la CDEP

Cun la renconuschientscha conferma la CDEP ch’ils dus studis da master correspundan cumplettamain als standards naziunals; tut las cundiziuns èn ademplidas. Las qualificaziuns d’instruir valan pia en tut ils chantuns sco er en il Principadi da Liechtenstein.

Ils dus programs da master èn vegnids lantschads l’onn 2022 da la SAP dal Grischun. Els sa drizzan a persunas che han in diplom da bachelor u da master en in rom d’instrucziun, sco per exempel matematica, tudestg u franzos, ma era natira e tecnica, moviment e sport fin ad art figurativ. Durant lur studi a temp parzial da trais onns amplifitgeschan las studentas ed ils students lur enconuschientschas dal rom cun cumpetenzas da la didactica dal rom, cumpetenzas pedagogicas e praticas professiunalas. Tgi che ha in diplom da bachelor, acquista uschia in diplom d’instrucziun per il stgalim secundar I. Las studentas ed ils students cun in diplom da master, acquistan in diplom cumbinà per il stgalim secundar I e per il gimnasi.

Bleras studentas e blers students instrueschan gia sper lur studi a temp parzial. Actualmain èn inscrittas 52 persunas en ils dus studis da master. Quellas e las 14 diplomandas e diplomands che han gia terminà il studi l’onn passà, profiteschan da la renconuschientscha en tut la Svizra.

Cun la renconuschientscha da la CDEP consolidescha la SAP dal Grischun sia posiziun sco instituziun da furmaziun per il stgalim secundar e presta ina contribuziun impurtanta per garantir persunas d’instrucziun qualifitgadas en il chantun Grischun ed en ulteriurs chantuns.