Communicaziun a las medias
La SAP dal Grischun guarda enavos sin in onn da gestiun plain success
La SAP dal Grischun terminescha l’onn da gestiun passà cun in surpli dal retgav da passa 1 milliun francs e cun in dumber da record d’inscripziuns.
L’onn da gestiun surpassa uschia cleramain las aspectativas. Il resultat positiv è d’attribuir principalmain als suandants facturs.
- La part da studentas e students cun domicil ordaifer il chantun Grischun è da nov tar 49 pertschient (fin ussa 47 pertschient). Questa tendenza, che cuntinuescha e s’intensivescha, ha purtà entradas pli autas or da la cunvegna davart las scolas autas spezialisadas.
- Ultra da las autas entradas dals champs furmaziun, furmaziun supplementara e servetschs per scolas s’etablescha la Scola auta da pedagogia dal Grischun adina pli fitg era sco instituziun da perscrutaziun cun relevanza naziunala ed internaziunala. L’amplificaziun da las activitads da perscrutaziun sa mussa er en il resultat dal manaschi: il volumen dals meds da terzs acquistads cun success – tranter auter dal Fond naziunal svizzer (FNS) – ha importà durant l’onn da rapport var 1,5 milliuns francs. La SAP dal Grischun ha quatter professuras: Scienzas d’educaziun, didactica da la matematica, talian e didactica dal talian sco era rumantsch e didactica dal rumantsch.
- Il terz factur èn plazzas betg occupadas en consequenza da las mesiras dal 2023 per stabilisar las finanzas.
Il retgav da gestiun da 30,7 milliuns francs vegn accumpagnà da custs da 29,6 milliuns francs.
Nov record da studentas e students
Actualmain fan 523 persunas la scolaziun per daventar persunas d’instrucziun per differents stgalims – uschè bleras sco anc mai.
Il studi il pli popular resta quel per daventar persuna d’instrucziun da la scola primara (1.-6. classa) cun 122 novas annunzias, suandà dal studi Scolina e scola primara (1.-2. classa) cun 28 novas entradas. La repartiziun da las linguas resta stabila en cumparegliaziun cun ils davos onns: 105 studentas e students èn da lingua tudestga, 14 da lingua rumantscha e 31 da lingua taliana. 27 persunas han cumenzà l’onn da rapport cun il studi da master Stgalim secundar I u cun il studi cumbinà Stgalim secundar I plus scolas da maturitad.
100 ulteriuras absolventas ed absolvents frequentan ils dus studis da master da Pedagogia curativa da scola (87 persunas) e Stgalim secundar I per persunas d’instrucziun dal stgalim primar (13 persunas). Quels studis vegnan purschids en cooperaziun cun autras scolas autas. Las studentas ed ils students èn immatriculads en quellas instituziuns.
Il rapport annual 2025 è disponibel online
Il rapport annual cumplet 2025 cun infurmaziuns detagliadas ed invistas en ils singuls prorectorats è uss disponibel qua: jahresberichte.phgr.ch.