Intervista

Furmaziun pratica professiunala: «Nus coordinain mintga onn 700 plazzas da praticum en scolas»

Co è la pratica professiunala sa midada en il decurs dals onns?

Ella è sa sviluppada vinavant areguard il cuntegn. Il connex cun la pratica ha gia adina gì ina gronda impurtanza en la scolaziun a la SAP dal Grischun. Oz absolvan las studentas ed ils students durant mintga onn da studi in praticum professiunal che sa basa mintgamai sin il precedent. Plinavant èsi pussaivel d’emprender d’enconuscher differents stgalims en ils praticums e da chattar uschia il stgalim da classa, en il qual ins sa senta era segir e bain. Fin la fin da l’emprim semester èsi ultra da quai anc pussaivel da midar il studi tschernì.

Co sa preparan las studentas ed ils students per il praticum?

Las studentas ed ils students vegnan partids en gruppas d’emprender cun resguardar criteris geografics e linguistics. Mintga gruppa survegn ina mentura u in mentur da la SAP dal Grischun. Quels han experientscha pratica ed èn tranter auter era responsabels per l’emna da studi avant il praticum respectiv. Quella serva a las lavurs da planisaziun e preparaziun.

Durant il praticum sustegnan las persunas d’instrucziun da la pratica las studentas ed ils students cun manar discurs per preparar e reflectar l’instrucziun. Quels nodan lur experientschas en in portfolio, ensemen cun lur cumprovas d’emprender. Suenter il praticum reflecteschan las studentas ed ils students ensemen cun la mentura u il mentur en la gruppa d’emprender ils accents da svilup tschernids individualmain. Quai pudess per exempel esser: «Dar cleras incumbensas da lavur» u «exercitar da manar ina classa».

Ultra da quai stat a disposiziun nossa plattafurma online Mahara a las studentas ed als students. Sin quella è da chattar litteratura davart differents champs spezialisads u davart accents da svilup. Quai è in servetsch nizzaivel, rimnà da nossas docentas e da noss docents. Sche jau pens che nus stuevan anc avant 20 onns tschertgar temas specifics en las bibliotecas!

Tge è in bun praticum?

In’emprima premissa impurtanta è che la direcziun da scola è averta per praticantas e praticants. Quai ans avra l’emprim access a las scolas. Displaschaivlamain datti anc adina scolas che na porschan nagins praticums professiunals. Sco segund èn quai era las persunas d’instrucziun motivadas che gidan a scolar nossas studentas e noss students. E sco terz: In praticum professiunal è alura gartegià, sch’ins discurra avertamain davart situaziuns da l’instrucziun e sch'ins vesa il success d’emprender da las studentas e dals students. Quai vala era per situaziuns che n’han betg funcziunà. Pertge sche tut vegn idealisà, na porta quai nagut. A la fin dovri motivaziun da tuttas varts: da la direcziun da la scola, da las persunas d’instrucziun da la pratica e da las studentas e dals students. Lura profitan er ils uffants – ed i dat ina situaziun da win-win.

Dependan las plazzas da praticum adina da l’engaschi da la direcziun da la scola?

I dat era persunas d’instrucziun che stattan a disposiziun independentamain da la direcziun da la scola, cunquai ch’ellas fan betg part d’ina scola da cooperaziun. Nus essan natiralmain fitg cuntents da questas persunas d’instrucziun. Il pli savens èsi dentant las direcziuns da la scola che motiveschan cleramain las persunas d’instrucziun da prender studentas e students en il praticum. Las direcziuns da la scola han ina posiziun-clav.

Pon scolas engaschar las praticantas sco forzas da lavur en las classas che distgargian las persunas d’instrucziun?

Na, quai è auter ch’en bleras branschas da l’economia. L’engaschi da las persunas d’instrucziun da la pratica n'è betg da sutvalitar. Perquai survegnan ellas er in’indemnisaziun per quai: Persunas d’instrucziun da la pratica scoladas survegnan ina pauschala da 350 francs per emna da praticum, persunas d’instrucziun betg scoladas 300 francs. Era las scolas da cooperaziun survegnan ina pitschna indemnisaziun da 100 francs per praticum.

Co persvadas ti las direcziuns da la scola?

Nus avain actualmain passa 40 scolas da cooperaziun en il Grischun, en la Val dal Rain da Son Gagl, en la Glaruna, en il Tessin ed er en il Liechtenstein. Cun il dumber creschent da studentas e students duvrain nus adina dapli plazzas da praticum. Actualmain èn quai 700 plazzas che nus coordinain. Per gudagnar novas plazzas visit jau persunalmain las direcziuns da la scola, ma preschent jau e decler noss concept da scolaziun sco era la necessitad dals praticums. Da sviluppar e tgirar ina rait da relaziuns facilitescha da chattar ulteriuras plazzas da praticum. Per las scolas datti la finala er avantatgs per occupar las plazzas libras. Forsa s’annunzia in’anteriura praticanta, perquai ch’ella enconuscha gia la scola. E las direcziuns da la scola enconuschan gia las persunas correspundentas che tschertgan ina plazza.

Tge fa uschiglio anc ora tia lavur?

Mia lavur consista per gronda part da coordinar il grond dumber da plazzas da praticum. I dat er adina puspè sditgas, per exempel pervi da midadas da plazza, gravidanzas u furmaziuns supplementaras. Lura essan nus dumandads da chattar novas plazzas da praticum. Per las emnas da studi cun las menturas ed ils menturs ston ins er organisar tut. Plinavant datti incumbensas pertutgant la reaccreditaziun e la garanzia da la qualitad.

La scolaziun per daventar persuna d’instrucziun da la pratica dura in onn. Pertge vali la paina da far questa scolaziun?

La finamira da la scolaziun è che persunas d’instrucziun da la pratica possian accumpagnar e valitar las studentas ed ils students da la SAP dal Grischun da maniera professiunala durant ils praticums. Ellas emprendan d’enconuscher il concept da la scolaziun e survegnan instruments per ils discurs da preparaziun e reflexiun. Uschia discurrin nus tuts ina lingua cuminaivla, cura ch’i va per il svilup da l’instrucziun. Plinavant vegnan las cumpetenzas communicativas approfundadas en vista a l’accumpagnament e la cussegliaziun, quai ch'è er in avantatg en auters champs da la vita.