Era quest onn è la participaziun puspè stada gronda: Gia entaifer paucs dis è ina gronda part dals plazs stada davent. Ensemen cun 15 firmas ed instituziuns da la regiun, 26 emprendistas ed emprendists sco er 18 persunas d'instrucziun futuras ha la SAP dal Grischun inspirà scolaras e scolaras da la 3. fin la 6. classa per activitads d'emprender en il champ da MINT. Las participantas ed ils participants èn s'occupadas e s'occupads da differentas perspectivas cun temas da MINT. Sco finiziun dal project han ellas ed els programmà in roboter uschia ch'el ha pudì schliar differents problems pratics - sa basond sin ils process da las singulas firmas.
Novaziun speziala: l'accumpagnament scientific
«La finamira dal project è da sviluppar tar las scolaras e tar ils scolars cumpetenzas da MINT e tar las persunas d'instrucziun futuras enconuschientschas professiunalas pedagogicas. I na sa chapescha betg da sasez che nus cuntanschain questas finamiras. Per quest motiv èsi ord vista scientifica impurtant per nus d'accumpagnar singuls process d'emprender a moda intensiva, per chapir meglier co ch'il svilup da cumpetenzas cun instruments digitals - surtut il schliar problems - reussescha», di prof. dr. Matthias Müller, il manader da project e manader da la professura per didactica da la matematica. Las persunas responsablas dovran latiers in design da perscrutaziun accumpagnant. Ils uffants lavuran en il project durant in di a la SAP dal Grischun en il lavuratori da robotica. «Quai ans dat la pussaivladad da documentar cun agid dad intervistas standardisadas lur occupaziun cun ils singuls problems dal champ MINT», uschia Müller. «Perquai ch'igl è spezialmain interessant tge strategias ch'ils uffants elegian, sch'els schlian problems cun instruments digitals.»
In project da cooperaziun
L'occurrenza è in project da cooperaziun da la SAP dal Grischun e d'interpresas ed instituziuns enconuschentas dal Grischun. Ensemen vulan els inspirar ils uffants per temas da MINT. Mintga onn crescha il dumber da partenaris. Actualmain sa participeschan 15 partenaris da l'entir chantun al project Aimara, Biosfera Val Müstair, EMS-Chemie AG, Georg Fischer AG, Banca Chantunala Grischuna, Hamilton Bonaduz AG, Inventx, Keller Laser AG, LogIn, PichaLain, Repower AG, Viafier retica, Trumpf Schweiz AG, Tschenett AG.
Ensemen contribueschan els in'impurtanta part a la promoziun da la generaziun giuvna per las professiuns da MINT en il chantun.
