Internaziunal

Dieta internaziunala davart plurilinguitad e minoritads linguisticas a Tavau

Dals 21 fin ils 23 da matg 2025 ha gì lieu en il center da congress a Tavau la 10avla dieta internaziunala “Plurilinguitad e minoritads linguisticas en in context global”. Igl è stà la 10avla ediziun da la dieta tradiziunala dal consorzi internaziunal “La plurilinguitad sco schanza”.

Passa 100 referentas e referents e 250 participantas e participants da passa 25 pajais – tranter quels l’Australia, l’India, il Canada, ils Stadis Unids e numerus stadis europeics – han discutà davart dumondas e svilups actuals en la perscrutaziun da la plurilinguitad e da las linguas minoritaras.

Fitg enritgints èn stads ils keynotes che han avert in vast spectrum da perspectivas: prof. dr. Ofélia García (City University of New York) ha discurrì davart metodas decolonialas da la plurilinguitad, prof. dr. Alexandre Duchêne (Universitad da Friburg) ha dilucidà il champ da tensiun tranter la plurilinguitad ed inegualitads socialas e prof. dr. Annelies Kusters (Heriot-Watt University) ha tematisà ils paradoxs da la lingua da segns internaziunala. Ulteriurs impuls èn vegnids da prof. dr. Kijan Espahangizi (Universitad da Turitg) davart la Svizra postmigranta, da prof. dr. Evangelia Adamou (CNRS) davart la flexibilitad cognitiva da pledadras e pledaders bilings e da David Kroik (Nord University) che ha discurrì d’ina perspectiva sama davart la revitalisaziun linguistica. La diversitad da las contribuziuns ha dà da pensar ed ha purschì numerus puncts da referiment per discussiuns.

La dieta è vegnida concepida ed organisada da la Scola auta da pedagogia dal Grischun e da la Scola auta da pedagogia da Lucerna en cooperaziun cun la SAP dal Vallais. Ultra da contribuziuns scientificas, ha il program accumpagnant purschì concerts, preschentaziuns da films ed in discurs litterar cun l’autur Usama Al Shahmani.

L'occurrenza è sa profilada cun la plurilinguitad vivida, cun access inclusivs (p.ex. interpretaziun en lingua da segns) e cun ina colliaziun internaziunala. Planisada è ina publicaziun che duai cuntegnair contribuziuns specificas da la dieta.