Dumagnà!

Finiziun dal CAS Direcziun da la scola 2023–25

Suenter dus onns han 62 participantas e participants terminà il venderdi passà lur scolaziun da certificat CAS. Els han uss il titel «Manadra da scola CDEP resp. manader da scola CDEP». Las absolventas ed ils absolvents derivan da l’entira Svizra orientala e lavuran en il chantun Grischun, Turgovia, Son Gagl, Turitg, Appenzell Dadora ed en il Principadi da Liechtenstein.

En la scolaziun cumplementara a la professiun da dus onns han las absolventas ed ils absolvents schlargià e consolidà lur cumpetenzas en differents temas directivs. En il modul da basa èn els sa famigliarisads cun la basa da manar ina scola. Sper sclerir l’atgna chapientscha da manar e concepir ina rolla adattada al context, èn era la communicaziun ed il management da qualitad stads en il center dal modul.

En il modul da certificat han las participantas ed ils participants tranter auter acquistà cumpetenzas d’agir en l’entir champ da la direcziun operativa da la scola. Plinavant è er stada en il center l’occupaziun cun las incumbensas specificas d’ina direcziun da la scola.

Ils colloquis davart la lavur da certificat ed ils forums avant la festa da certificat han ultra da quai pussibilità in’occupaziun captivanta e focusada cun temas relevants per il mintgadi professiunal. En quest connex han pudì vegnir elavuradas a medem temp l’orientaziun a la pratica e las expertisas professiunalas.

La festa da certificat ha gì lieu da bell’aura da stad a la Scola auta da pedagogia da Son Gagl en l’edifizi da la scola auta Stella Maris a Rorschach. Prof. Regula Flisch, prorectura furmaziun supplementara e servetschs da la SAP da Son Gagl, ha beneventà las participantas ed ils participants. Thomas Minder, manader da scola ad Eschlikon e president da la Federaziun da mainascolas da la Svizra (VSLCH), ha explitgà las pussaivladads ed il senn dal management agil cun agid d’exempels pratics ed ha illustrà las consequenzas per las incumbensas da manar. La manadra generala NSF, dr. Viviane Hoyer, ha undrà la prestaziun professiunala e persunala da las absolventas e dals absolvent che han gì da dumagnar – ultra da la scolaziun intensiva e dal cumenzament da la professiun – sfidas pli grondas sco la mancanza da persunas d’instrucziun. Musicalmain è la festa vegnida accumpagnada da Larissa Wiederkehr cun la clarinetta e da Stephan Hürlimann al clavazin.

Nus gratulain a tut las absolventas ed a tut ils absolvents per lur success e giavischain tut il bun per lur ulteriura activitad professiunala!