130 participantas e participants a la dieta «Promoziun da talents ozendi»

La sonda, ils 22 da mars, ha gì lieu la dieta «Promoziun da talents ozendi: gidar a concepir l’ambient da viver ed il futur » da las scolas autas da pedagogia da Son Gagl e dal Grischun. Var 130 expertas ed experts da la furmaziun, da la scienza e da la politica han discutà davart concepts innovativs per promover ils talents e co concepir in sistem da furmaziun orientà al futur. En il center è stada la dumonda co che scolas pon preparar lur scolaras e scolars il meglier pussaivel per applitgar la savida acquistada en vista a sfidas actualas e futuras. Uffants e giuvenils spezialmain talentads dovran ina promoziun sistematica per pudair trair a niz cumplainamain lur potenzial e per sviluppar vinavant sistematicamain las cumpetenzas 4C – creativitad, in pensar critic, cooperaziun e communicaziun.

In highlight spezial da la dieta è stada la preschentaziun dal project «Circular Futures» tras uffants da la scola primara che derivan da la promoziun da talents. Ils talents giuvens han mussà a moda impressiunanta, co ch’els èn s’occupads dad ideas futuras persistentas e co ch’els sviluppan soluziuns innovativas.

Referats spezialisads inspirants e lavuratoris datiers da la pratica

Dus referats da keynote han furmà il rom tematic da la dieta. Prof. dr. Anne Sliwka ha preschentà il concept dal «Deeper Learning» che collia enconuschientschas dal rom fundadas cun il diever pratic e che porscha uschia ina basa ideala per promover talents. En il segund referat ha prof. dr. Andreas Dengel preschentà la «Scola d’Ikigai», in model che tira a niz tecnologias da furmaziun modernas per pussibilitar a las scolaras ed als scolars vias d’emprender individualisadas.

En numerus lavuratoris orientads a la pratica han las participantas ed ils participants survegnì invistas concretas en metodas da promoziun innovativas. Uschia è per exempel vegnida preschentada la promoziun da leger persunalisada tras plattafurmas sustegnidas dad IA, la metoda creativa dad Escape Games en l’instrucziun è vegnida tematisada e la rolla dad IA e robotica per la furmaziun da scola e vegnida dilucidada. Era l’impurtanza da lieus d’emprender ordaifer la scola e la collavuraziun tranter scola e chasa paterna èn stads en il focus. In ulteriur aspect da la dieta è stada la dumonda co che la politica da furmaziun, las autoritads da scola e las persunas d’instrucziun pon implementar da maniera persistenta concepts communabels per promover talents. Experientschas da la citad da Turitg, che ha introducì in nov concept da promoziun da talents e da persunas talentadas, han intermedià enconuschientschas preziusas da la pratica.

Rom musical cun scolaras e scolars actuals ed anteriurs

Per in’atmosfera speziala han procurà las contribuziuns musicalas da scolaras e scolars actuals ed anteriurs da la promoziun da talents da la SAP da Son Gagl. Cumenzà han Simon Hotz e Kai Meier che han procurà per las emprimas risadas dal di cun lur chanzun «Die Pedagogen». Suenter la pausa da mezdi ha Arina Zurlinden, studenta da la SAP da Son Gagl, fascinà cun in toc da clavazin da Chopin. Il punct final ha fatg Richi Küttel, il poet da spoken word, cun preleger ses protocol da la dieta creativa.