Mez zercladur è stà l’ultim termin d’annunzia a la SAP dal Grischun. 191 studentas e students èn s'annunziads per in studi a Cuira. Cun quai èn las annunzias sut il record aut dals onns precedents, a medem temp dentant sur la media da plirs onns. Il dumber da studentas e students resta tut en tut stabil sin in aut nivel cun bundant 500 studentas e students.
La professiun da scolast:a è anc adina dumandada tar persunas che sortan da la scola sco era tar persunas d’auters champs professiunals. Quai mussa la statistica actuala d’annunzias da la SAP dal Grischun. Fin mez zercladur èn 191 persunas s'annunziadas per il studi da bachelor u da master che cumenza il settember.
Il pli tschertgà è la furmaziun per il stgalim primar
Cun 132 persunas ha il studi Scola primara (1. fin 6. classa) las pli bleras annunzias (onn precedent: 170). Var in terz da las studentas e dals students annunziads vegn ad absolver il studi en talian u rumantsch. Per il studi Scolina e scola primara (1. fin 2. classa) èn s'annunziads 36 studentas e students (onn precedent: 43), 12 da quels cun lingua da scola talian u rumantsch. A la SAP dal Grischun vegnan las persunas d'instrucziun scoladas per tudestg, rumantsch u talian. In diplom biling en las cumbinaziuns talian-tudestg u tudestg-rumantsch è medemamain pussaivel. Ils diploms d’instrucziun d’omadus studis èn renconuschids en l’entira Svizra. Quai è in ulteriur motiv daco che danovamain blers giuvenils dal Grischun e dals chantuns vischins sco er dal Principadi da Liechtenstein èn sa decidids da far in studi a Cuira l’onn proxim. "Il grond dumber da studentas e students en general sco er il dumber considerabel da studentas e da students rumantschs e talians èn d'impurtanza centrala, cunzunt per il chantun Grischun sco era per ils chantuns vischins ed il Principadi da Liechtenstein, tant pli ch'ins po prestar cun els ina contribuziun essenziala per mitigiar la situaziun da recrutaziun", accentuescha Gian-Paolo Curcio, il rectur da la SAP dal Grischun.
Per ils dus studis da master Stgalim secundar I e Stgalim secundar I e scolas da maturitad, ch'èn vegnids lantschads da nov avant dus onns, datti actualmain 23 annunzias (onn precedent: 21). Il studi sa drizza a persunas interessadas cun in diplom da bachelor u da master specific en in rom da la scola populara, sco p.ex. matematica, tudestg u talian, dentant era natira e tecnica, moviment e sport fin a l’art figurativ. "La scolaziun da persunas d’instrucziun per il stgalim secundar I e per las scolas da maturitad ha ina gronda impurtanza per il chantun Grischun, tant pli che questa purschida pussibilitescha da promover la generaziun giuvna da persunas d’instrucziun a Cuira e da resguardar a medem temp ils basegns spezials dal chantun Grischun triling", punctuescha il rectur Curcio.
Betg integrads en questas cifras èn las studentas ed ils students dals dus studis da master Svilup da la scola e Pedagogia curativa da scola. Il studi Pedagogia curativa da scola porscha la SAP dal Grischun en cooperaziun cun la Scola auta per pedagogia curativa Turitg. Totalmain 27 studentas e students cumenzan quest studi l’atun 2024 (onn precedent: 25). "Dapi la midada dal cumenzament da mintga dus onns a mintg’onn, è il dumber da studentas e students dal studi Pedagogia curativa da scola sa redublà. Quai munta che tranter 250 e 300 pedagogas e pedagogs curativs da scola pon probablamain vegnir diplomads en 10 onns", sa mussa il rectur Curcio satisfatg.
Il dumber total da studentas e students s’augmenta vinavant
Era quest onn vegn il dumber da las persunas che cumenzan il studi ad esser pli grond ch’il dumber da studentas e students che termineschan il studi. Malgrà che la SAP dal Grischun na po betg cuntinuar quest onn cun las cifras da record dals onns precedents, è il rectur Gian-Paolo Curcio cuntent: "Nus ans legrain fitg che nus avain puspè pudì entusiasmar bleras persunas giuvnas per in studi a la SAP dal Grischun. Era sche nus registrain ina pitschna reducziun visavi l'onn precedent, na dastgain nus betg emblidar ch’il dumber d’annunzias è stà extrem aut ils ultims onns. Be ils ultims trais onns è il dumber total da las studentas e dals students s'augmentà per bundant 30 pertschient. Savens survesain nus ch'in tal augment è adina era collià cun resursas d'infrastructura, da persunal e resursas finanzialas ch'ins sto metter a disposiziun. Malgrà la creschientscha dain nus vinavant gronda paisa a la qualitad da nossa scolaziun."
Remartga: Il dumber effectiv da las studentas e dals students po anc sa midar fin al cumenzament da l’onn da studi. Quai stat en connex cun il fatg che las cundiziuns d’admissiun n'èn betg anc ademplidas il mument da l’ultim termin d’annunzia e/u cun pliras annunzias a differentas scolas autas.
Vulais Vus promover ed accumpagnar uffants da la scolina fin en la 2. classa? Sco persuna d’instrucziun gidais Vus ils uffants da sa sviluppar tenor lur preferenzas. A la Scola auta da pedagogia dal Grischun emprendais Vus co elavurar cuntegns da maniera didactica e co stgaffir in’atmosfera positiva en stanza da scola.
ulteriuras infurmaziuns
Sco scolast/a dal stgalim primar instruis Vus uffants da l’emprima fin sisavla classa. Vus stgaffis chaschuns d’emprender cun las qualas las scolaras ed ils scolars pon sa sviluppar da maniera optimala. La Scola auta da pedagogia As prepara sin l’instrucziun en tut ils roms dal plan d’instrucziun e pussibilitescha d’applitgar models teoretics da maniera pratica.
ulteriuras infurmaziunsIhr Browser (IE 11) ist leider zu alt und wird nicht mehr unterstützt.