Emprender communablamain

Perfecziunaments a l'intern da la scola

Spazi d’emprender – pussibilitar vias d’emprender individualas

Emprender dovra spazi – per pensar, per sa sviluppar, per sa scuntrar. La stanza da scola vegn scuverta da nov, cun il Model da Cuira e cun l’Universal Design for Learning (UDL) vegnan dadas differentas egliadas sin l’instrucziun e vegnan sviluppadas incumbensas d’emprender che permettan differents access, che pussibiliteschan la varietad e che sveglian il plaschair d’emprender.

Accumpagnament d’emprender – prender en egl l’emprender ensemen cun las scolaras ed ils scolars

Las persunas d’instrucziun s’occupan cun lur rolla d’accumpagnadras e d’accumpagnaders d’emprender ed emprendan d’enconuscher ils princips che rendan visibels ils process d’emprender e che rinforzan l’atgna responsabladad da las scolaras e dals scolars. En il focus stattan las scolaras ed ils scolars che gidan a concepir l’emprender. Cuminaivlamain vegnan reflectadas experientschas e sviluppadas strategias adattadas per il mintgadi.

Valitaziun – tge vegn valità cura e co?

Communablamain vegn reflectada l’atgna chapientscha da valitaziun ed approfundada a maun da basas teoreticas actualas. Las persunas d’instrucziun e las direcziuns da la scola s'occupan da furmas da valitaziun extendidas e da lur funcziuns. Uschia pon ellas chapir co ch’in diever intenziunà e conscient po promover il meglier pussaivel ils process d’emprender da las scolaras e dals scolars.

L’emprender cuntinuant – promover sistematicamain cumpetenzas interdisciplinaras en l’instrucziun

L’emprender per vita duranta premetta l’abilitad da regular sez l’agen emprender. Las persunas d’instrucziun e las direcziuns da la scola reflecteschan lur agen emprender sco basa per promover sistematicamain las cumpetenzas traversalas, ils Future Skills e l’emprender autoregulà da las scolaras e dals scolars.

Strategias d’emprender – intermediar sistematicamain strategias en l’instrucziun

En quest perfecziunament a l’intern da la scola emprendan las persunas d’instrucziun da promover cun cleras finamiras strategias d’emprender e da rinforzar uschia l’autoregulaziun e las cumpetenzas traversalas da las scolaras e dals scolars. En quest connex vegnan ils aspects cognitivs, metacognitivs, motivaziunals ed emoziunals approfundads sa basond sin la pratica ed elavuradas ideas per realisar l’atgna instrucziun.

Pensar la sanadad – sviluppar la scola

Quest perfecziunament a l’intern da la scola sa drizza a teams da scola che vulan francar la sanadad en il mintgadi da scola. Cuminaivlamain reflecteschan las participantas ed ils participants tge ch’è caracteristic per ina scola che promova la sanadad. Els discutan cundiziuns da reussida e sviluppan cun agid da las directivas da la Rait da scola21 impuls concrets per l'instrucziun, per la collavuraziun e per il svilup da la scola.

Ferm en il mintgadi da scola – strategias da resilienza per persunas d’instrucziun e direcziuns da la scola

Ultra da la cumpetenza professiunala vegn era pretendì da las persunas d’instrucziun e da las direcziuns da la scola fermezza interna e resistenza psichica per restar effectiv e saun a lunga vista. Las participantas ed ils participants reflecteschan resursas persunalas e sviluppan strategias per il mintgadi da scola. Il transfer en la scola mussa co che sustegn, relaziuns e rutina promovan la resilienza e rinforzan ina cultura sauna en chasa da scola.

Participaziun – sviluppar ensemen ina cultura da scola

Sche scolaras e scolars dastgan gidar a concepir la scola sco spazi d’emprender e da viver, sviluppan els impurtantas abilitads socialas e democraticas. La participaziun rinforza la convivenza, promova la confidenza, creescha in clima da scola avert, plain respect e rinforza la capacitad da chargia da la scola. En quest perfecziunament a l’intern da la scola vegn perscrutà co che vaira participaziun reala po vegnir pussibilitada en il mintgadi da scola.

Potenzial da team – concepir la collavuraziun da maniera effectiva e profitabla

Sulets dumagnain nus bler, ma en il team sviluppain nus noss entir potenzial. Sche confidenza, cleras cunvegnas e finamiras cuminaivlas vegnan ensemen, datti ina forza ch’animescha l’instrucziun, che rinforza la cultura da scola e che fa che l’emprender è in gudogn per tuts.

Elavurar cun success ina cooperaziun cun ils geniturs

Ils ultims 30 onns èn la societad e la scola sa midadas fermamain, uschia ch’era la lavur cun ils geniturs sto ademplir novas pretensiuns. Il perfecziunament porscha la chaschun da reflectar l’atgna lavur cun ils geniturs, da l’examinar criticamain e da l’adattar en cas da basegn.

Digitalitad – emprender en ina cultura digitala

La digitalisaziun cuntinuanta, rinforzada tras IA, mida tant ils cuntegns didactics sco er la maniera d’emprender e pretenda da las persunas d’instrucziun novas cumpetenzas sco er ina chapientscha adattada da l’instrucziun. Il perfecziunament porscha spazi per reflectar l’atgna pratica, emprender d’enconuscher concepts didactics innovativs e spazi da sviluppar ideas concretas per l’instrucziun.

Previsiun – enconuscher las schanzas, concepir il futur

Las scolas èn confruntadas cun sfidas cumplexas e ston sa sviluppar vinavant en vista a las midadas socialas, a la nova perscrutaziun d’emprender ed als basegns multifars. I dovra visiuns cuminaivlas, process participativs e l’integraziun da tut ils acturs per cuntanscher midadas persistentas. En ina simulaziun pon ins experimentar il svilup da la scola da maniera pratica e differentas perspectivas vegnan reunidas a soluziuns solidas.

Persistenza – agir cun responsabladad sco cuminanza da scola

La Furmaziun per in svilup persistent (FSP) è francada en il Plan d’instrucziun 21 sco tema interdisciplinar e pretenda che las scolas n’instrueschian betg mo persistenza, mabain vivian ella sco cuminanza da scola.

Quest perfecziunament entaifer la scola reunescha persunas d’instrucziun, scolaras e scolars ed ev. geniturs per elavurar en teams projects concrets e per uschia render perceptibel FSP datiers da la pratica e da la cuminanza.