Lieu d’instrucziun e da recreaziun
Iert d’emprender

Instrucziun amez la natira. Creai cun nus in’instrucziun orientada a l’acziun e vivai in ad in il mund da flora e fauna. L’iert d’emprender cun vista grondiusa sin il Calanda e vers la Surselva porscha plinavant spazi per sa recrear e po vegnir utilisà per occurrenzas. Ina pitschna stanza da scola ed ina susta cuverta stattan a disposiziun.

Natira multifara

Scuvri la gronda varietad da culturas da legums e dad ervas, da flurs e da chaglioms, il prà magher ed il prà grass sco er ils dus biotops. Tranter las eras chattan studentas e students, persunas d’instrucziun e scolaras e scolars mirs sitgs cun craps indigens. Ina saiv viva selvadia cun plantas tenschidras e bostgaglia locala circumdescha il curtin. 

Finamira

L’iert serva sco object da demonstraziun per l’instrucziun interna ed externa. Plinavant al pudais utilisar per perfecziunaments. Nus prendain gugent encunter reservaziuns tant per occurrenzas internas sco er externas cun classas da scola.  

Filosofia

La conscienza per natira ed ambient stat en in stretg connex cun la persistenza. Cun l’iert d’emprender mussain nus la varietad da flora e fauna e dain vinavant questas enconuschientschas. Uschia sustegnain nus la finamira 15 (SDG 15) da l’agenda 2030 da la confederaziun. 

Website eda.admin.ch, Ziel 15 

Utilisaziun per classas da scola externas

L’iert d’emprender stat a disposiziun a persunas d’instrucziun externas e lur classas. Nus As purschain ina vasta schelta da temas concernent la furmaziun per il “svilup persistent”:  

  • semnar, plantar e racoltar da legums e dad ervas  
  • varietad da legums e dad ervas  
  • culturas maschadadas da legums e dad ervas  
  • il tartuffel e ses “secrets”  
  • cumpostar  
  • terra 
  • flurs 
  • chaglioms selvadis 
  • lajet / biotop 
  • biodiversitad 
  • ed ulteriurs differents temas en connex cun iert e natira. 

 

Vuschs suenter ina visita da liert d’emprender 

L’iert d’emprender è ina vaira aventura natirala ed ecologica per tut las visitadras e tut ils visitaders. Scolaras e scolars d’ina emprima classa primara ha per exempel pudì realisar in project d’erizun ed ha pudì tractar quest tema durant pliras emnas. Las scolaras ed ils scolars eran fitg motivads ed han rimnà experientschas durablas. Vegni ed As laschai surprender! 

Nus ans legrain sin in emprim contact via e-mail. Segiramain chattain nus communablamain ils temas adattads per Vossa instrucziun.  

Utilisaziun per occurrenzas

Nus prendain gugent encunter reservaziuns. 

Kontakt

Ihr Browser (IE 11) ist leider zu alt und wird nicht mehr unterstützt.