Direcziun da l‘organisaziun
Profil

La Scola auta pedagogica dal Grischun ha grondas finamiras. Nossas valurs, nossa visiun e missiun e nossa strategia ans gidan da cuntanscher questas finamiras. Ellas èn il fundament da noss agir e da noss cumportament.

Valurs

Nus ans inscuntrain cun respect, renconuschientscha e stima. Nus ans regalain confidenza ed agin da maniera professiunala e cun responsabladad. Sinceradad e communicaziun èn il fundament per ina buna collavuraziun.

Visiun

En il center da nossa lavur stattan dumondas en connex cun la visiun „lernen, instruir, sviluppare“. La visiun cumpiglia d’ina vart la perspectiva da las studentas e dals students da la SAP dal Grischun che emprendan, instrueschan e sviluppan. Da l’autra vart muss ella la perspectiva da l’organisaziun SAP dal Grischun che emprenda, instruescha e sa sviluppa. En il center da nossa visiun stat la trilinguitad e la missiun da l’instituziun da furmaziun SAP dal Grischun.

Missiun

La missiun da la SAP dal Grischun e la scolaziun e la furmaziun cuntinuada da persunas d’instrucziun. La SAP dal Grischun porscha studis pedagogics da bachelor e da master. La scola auta fa perscrutaziun e svilup cun orientaziun a l’applicaziun e porscha prestaziuns da servetsch a terzas persunas. En tut questas activitads resguarda la scola auta ils basegns dal chantun Grischun.


Strategia

La SAP dal grischun scolescha persunas d’instrucziun per la scola populara. Ella promova lur perfecziunament professiunal cun resguardar la perscrutaziun ed il svilup dal rom e da la didactica dal rom. La perscrutaziun sa concentrescha sin ils trais accents tematics “plurilinguitad”, “scola alpina” e “scola e tecnica”. La relaziun directa cun la pratica en scola ha ina gronda impurtanza.

Accents strategics

Sviluppar la furmaziun en la midada digitala

La SAP dal Grischun nizzegia la midada digitala per la furmaziun, spezialmain en ils champs matematica, informatica, scienzas natiralas e tecnica. En il center stattan en quest connex las enconuschientschas da la perscrutaziun e dal svilup dal rom e da la didactica dal rom sco era quellas da las cooperaziuns cun las scolas e cun l’economia. La finamira è da scolar persunas d’instrucziun cumpetentas e conscientas da la responsabladad, da las perfecziunar e da las colliar ina cun l’autra.

Accents strategics

Nizzegiar la varietad linguistica sco schanza
Rinforzar la scola e l’instrucziun en il territori alpin
Sviluppar la furmaziun en la midada digitala
Realisar la SAP dal Grischun per il futur

Sut il PLUS vegn anc

Nizzegiar la varietad linguistica sco schanza La SAP dal Grischun rinforza las trais linguas chantunalas e pussibilitescha l’access ad ulteriuras linguas e promova uschia la plurilinguitad. Ella ha etablì la professura speziala per didactica da plurilinguitad integrada, sviluppa meds d’instrucziun e fa perscrutaziun dal rom e da la didactica dal rom. Las collavuraturas ed ils collavuraturs da la SAP dal Grischun garanteschan sco spezialistas e spezialists ina scolaziun e furmaziun cuntinuada interdisciplinara ed attractiva.

Rinforzar la scola e l’instrucziun en il territori alpin

La SAP dal Grischun scolescha persunas d’instrucziun per la scola dal futur cun cumpetenzas per ils roms e cumpetenzas transversalas. Ella resguarda en sia scolaziun lieus d’emprender ordaifer la scola, sensibilisescha per in svilup persistent, rinforza la relaziun cun l’eterogenitad. Ella utilisescha da maniera effectiva ils resultats da la perscrutaziun e dal svilup dal rom e da la didactica dal rom sco era las experientschas da la pratica. In accent vegn mess sin ils roms artistics, sin musica e sin sport.

 

Realisar la SAP dal Grischun per il futur

La SAP dal Grischun porscha a las studentas ed als students ed a las persunas d’instrucziun cundiziuns da basa optimalas per ina scolaziun e furmaziun cuntinuada che ha success e ch’è orientada a la professiun. Ella porscha a tut las collavuraturas ed a tut ils collavuraturs cundiziuns da lavur progressivas, promova l’emprender cuntinuant, ha quità da sia cuminanza e rinforza quella. Uschia presta la SAP dal Grischun ina contribuziun activa per la convivenza sociala e culturala en il chantun Grischun. La SAP dal Grischun furma ed elavura ses futur da maniera communabla, persistenta e cun auta qualitad. Ella sa sviluppa sin tut ils nivels sco scola auta da pedagogia cun resguardar sia structura e cultura unica.

Ihr Browser (IE 11) ist leider zu alt und wird nicht mehr unterstützt.