Direcziun da l'organisaziun

Post da stab per linguas chantunalas

Ina incumbensa principala dal post da stab per linguas chantunalas è la translaziun da differents geners da texts en las trais linguas chantunalas. Per exempel documents uffizials da l'instituziun, communicaziuns internas ed externas, il rapport annual u material didactic per las docentas e per ils docents. La website trilingua metta a disposiziun infurmaziuns per tut las persunas interessadas da las trais regiuns linguisticas. Grazia al servetsch da translaziun daventa la trilinguitad pussaivla, visibla e viva a la SAP dal Grischun.

Las quatter collavuraturas dal post da stab sa participeschan activamain a projects da perscrutaziun e da svilup. En connex cun incumbensas che pertutgan la lingua collavuran ellas stretgamain cun ils prorectorats da la furmaziun e da la furmaziun cuntinuada. Il spectrum dals projects dal post da stab è multifar e cumpiglia tranter auter il svilup da certificats linguistics sco era l'elavuraziun da concepts per la plurilinguitad. Ultra da quai sa stenta il post da stab per linguas chantunalas cuntinuadamain da render perceptibla la trilinguitad funcziunala en il mintgadi da la scola auta cun iniziar projects ed activitads pli pitschnas.

Il team dal post da stab per linguas chantunalas accumpogna e cusseglia la direcziun da la scola e las studentas ed ils students en dumondas linguisticas, sco per exempel en connex cun il diplom biling, cun certificats da lingua u cun il segiurn linguistic. Il barat davart dumondas da lingua cun las studentas ed ils students, sco era cun las collavuraturas ed ils collavuraturs è in element essenzial dal post da stab. 

Il post da stab per linguas chantunalas ha ina funcziun da coordinaziun e cooperaziun e lavura stretgamain ensemen cun autras partiziuns da la scola auta quai che pertutga temas e projects linguistics. Cun sia expertisa ed experientscha sustegna el spezialmain il stab dal rectorat, ils prorectorats furmaziun e furmaziun cuntinuada sco era las professuras cun focus sin rumantsch e talian e didactica da plurilinguitad.

Il team dal post da stab per linguas chantunalas maina l'International Office da la SAP dal Grischun. Quel promova e coordinescha ils partenadis da la scola auta cun autras scolas autas spezialisadas sin la furmaziun, sco era la mobilitad da studentas e students e da collavuraturas e collavuraturs en Svizra ed en l'exteriur. L’IO è medemamain l'emprim post da consultaziun per tut las studentas e tut ils students externs, sco era per tut las collavuraturas e tut ils collavuraturs externs d'autras scolas autas che s'interessan per in semester da barat u per in program a curt temp a la SAP dal Grischun.

A la pagina da l'International Office