Servetschs

Perfecziunaments a l'intern da la scola

Nus integrain tematicas che stattan actualmain en il focus da Vossa scola. Il cuntegn ed il format vegnan realisads tenor ils basegns specifics da la scola.

Ultra dals temas specifics che la scola giavischa, po la suandanta tscherna dals temas esser in punct da colliaziun pussaivel per Voss perfecziunament a l’intern da la scola.

• Scola sauna cun la rait da scola21
  Co collavurain nus, co communitgain nus, co main jau la scola, co lavur jau en in team? En il center stattan la basa e las opziuns d’agir cun la finamira che tut las participantas ed ils participants a la scola restian sauns ed effizients a lunga vista. En cooperaziun cun l’uffizi da sanadad dal Grischun purschain nus ina vista cumplessiva cun programs sco "MindMatters" u "Scola agescha".
  
  
• Educaziun sexuala
  Da sustegnair uffants e giuvenils en il svilup da lur identitad sexuala è ina part impurtanta da lur sanadad sexuala. Sco persuna d’instrucziun essas Vus abla da realisar adequatamain a la vegliadetgna temas specifics da la pedagogia sexuala (p.ex. dretgs sexuals, maletg corporal e midadas corporalas, diversitad sexuala e da gener).
  
  
• KI en scola?!
  Co pon tools da KI gidar a facilitar la lavur da persunas d'instrucziun? Co als pon ins integrar en il mintgadi da scola? Nus sclerin aspects didactics, tecnics ed etics dal diever da KI en scola e nus sclerin la dumonda tge ch’intelligenza artifiziala ha da far cun intelligenza natirala.
  
  
• LOmS – chattar soluziuns fa scola
  Sin basa da la metoda sistemica orientada a soluziuns vegnan focussads temas sco: manar ina classa, accumpagnament d’emprender, cumpetenzas transversalas, collavuraziun e relaziun in cun l’auter, dumagnar situaziuns pretensiusas e communicaziun.
  
  
• Incumbensas – reflexiun d'emprender – valitaziun
  Cun las trais unitads da curs coordinadas ina cun l'autra po vegnir analisada e sviluppada vinavant l’atgna pratica en ils champs centrals da l’emprender e da l’instruir e quai cun cleras finamiras.
  Ils trais temas pon vegnir integrads individualmain u communablamain en in svilup da l’instrucziun che sa referescha al process.
  
  
• Promoziun integrativa da talents e persunas talentadas
  Co po vegnir optimada l’instrucziun che promova ils talents en nossa scola? Entaifer la classa? En purschidas sur pliras classas tenor talents ed interess? Nus mussain differentas ideas per la realisaziun en la pratica, intermediain las basas necessarias ed As cun realisar ils accents giavischads.
  
  
• Collavuraziun multiprofessiunala en il context da scola
  En nossas scolas collavuran adina dapli differentas professiuns a favur da las scolaras e dals scolars. Co pon ins concepir questa collavuraziun, en la quala persunas cun differentas resursas, incumbensas e cun differents basegns èn participadas? Nus mussain la basa e las pussaivladads, per che tut las persunas participadas possian contribuir a l’emprender ed al bainstar da las scolaras e dals scolars e possian sa sentir efficazi.

Per mantegnair l’efficacitad da perfecziunaments a l’intern da la scola, èn in’orientaziun a las finamiras e l’organisaziun dal process a lunga vista da gronda impurtanza. Perquai ston ins prender en mira d’integrar perfecziunaments a l’intern da la scola en process da svilup da la scola e da l’instrucziun. Nus purschain ils sequents formats:

• curs d'in entir di
• curs d'in mez di
• lavuratoris da 2 uras

Las furmaziuns supplementaras pon vegnir fatgas al lieu en Vossa scola. Gugent organisain nus era furmaziuns supplementaras per teams en lieus d’emprender ordaifer la scola. Dad esser ina giada davent dal mintgadi da scola e da la chasa da scola po esser fitg inspirant e po sustegnair process da svilup.