Dals 14 fin e cun ils 18 d’october 2024 èn vegnids preparads per la dieschavla giada 200 uffants da la scola primara e 40 persunas d’instrucziun futuras - en stretga collavuraziun cun emprendistas ed emprendist d’entant sedesch firmas dal Grischun - durant in’emna sin il mund tecnologic da damaun.
Marclar, resgiar, programmar, construir, lutegiar: Durant in’emna han en tut 200 scolaras e scolars (3. – 6. classa) pudì scuvrir ils cuntegns da MINT cun agid dad incumbensas orientadas a problems or da lur mintgadi. Instruids ed instruidas dad emprendistas ed emprendists dals manaschis participads sco era da studentas e students da la SAP dal Grischun han ils uffants ed ils giuvenils pudì experimentar cun cuntegns tecnics ed han a la pudì sa legrar d’in product creà sez. Durant in di han las participantas ed ils participants programmà a la SAP dal Grischun in roboter, uschia che quel ha pudì schliar differentas incumbensas or dal mintgadi da las singulas firmas. Champs da gieu ch’èn vegnids sviluppads da las emprendistas e dals emprendists da las firmas èn stads la basa per questa lavur.
L’emna da MINT dal Grischun (MINT-CAMPs GR) collia l’economia e la scola
Emprendistas ed emprendists da las firmas e las instituziuns participadas dal Grischun lavuran stretgamain cun studentas e studentas da la SAP dal Grischun. Ensemen dattan ellas ed els vinavant la fascinaziun per activitads praticas ed instrueschan las scolaras ed ils scolaras en il menaschi al lieu.
Las persunas d’instrucziun futuras engrondeschan en il rom da questa cooperaziun cun agid d’experientschas da hands-on lur savida dal rom, lur savida didactica e pedagogica. En il medem mument dattan las emprendistas ed ils emprendists dals manaschis vinavant lur savida acquistada als uffants ed a las persunas d’instrucziun futuras.
Aileen da Laax, scolara da la terza classa descriva: “Jau hai emprendì che nitrogen ha -160 grads e schelenta fitg svelt objects. Tar Keller Laser avain nus fatg il gieu "4 gudogna" ed a mai ha plaschì co che nus avain pudì dar si sezs lac als jetons per il gieu. Tar ils tecnologs da materias sinteticas en la Ems Chemie AG hai jau emprendì co che las maschinas funcziunan e sin tge che jau hai da guardar.”
Kimberly medemamain da Laax (3. classa) rapporta da sias experientschas sco suonda: “Tar Keller Laser hai jau emprendì ch'ins sto sa proteger per ch'i na dettia nagins accidents. Ed a mai ha plaschì che nus dastgavan far bler sezs, sco per exempel mular, dar si lac e mesirar en lavuratori. Jau hai lura emprendì en la Ems Chemie AG che granulat è char, quai na savev'jau anc betg avant ed jau era impressiunada.”
“Per mai sco persuna d'instrucziun futura èsi stà fitg instructiv dad observar ils uffants ordaifer la stanza da scola. Uschia hai jau emprendì d’enconuscher els or dad in’autra perspectiva – tant en lur interacziun in cun l’auter sco er en la lavur autonoma. Igl è sa mussà che l’emprender na succeda betg mo vi dal pult e cun farpensums. Questa experientscha m’ha mussà quant prezius che lieus d’emprender ordaifer la scola èn, cunquai ch’els porschan als uffants in ambient d’emprender varià ed inspirant. Tals lieus pussibiliteschan da cuntanscher ils uffants sin differents nivels e d’als promover individualmain. Ils uffants han demussà grond interess e la prontezza d’emprender. Questas experientschas ma vegnan ad esser nizzaivlas en l’instrucziun en la pratica. Jau hai percurschì quant impurtant ch’igl è d’enconuscher ils basegns ed ils interess dals uffants e d’integrar quels en la planisaziun da l’instrucziun sper las cumpetenzas ch'els ston acquistar.” Uschia rapporta Laurin Zala da Trin Mulin, student a la SAP dal Grischun en il 2. onn da studi, a moda e maniera impressiunanta da sias experientschas preziusas ch’el ha pudì far durant quest’emna en collavuraziun cun emprendistas ed emprendists e constudentas e constudents.
La SAP dal Grischun ha realisà l’onn 2014 per l’emprima giada cun 24 uffants e giuvenils l’emna da MINT dal Grischun en la Ems Chemie SA a Domat e sviluppà vinavant quella ils davos onns ensemen cun ulteriurs manaschis. Il program da promoziun da MINT vegn manà da persunas d’instrucziun cun experientscha e futuras che vegnan scoladas specificamain dal team da MINT da la SAP dal Grischun. La stretga collavuraziun cun l’economia fa grond plaschair a la manadra da project da la SAP dal Grischun, Lilian Ladner: «Nus concentrain nossas fermezzas e nossa resursas – nus emprendain in da l’auter ed in cun l’auter. D’ina vart engrondeschan nossas studentas e noss studentas en la cooperaziun cun las emprendistas ed ils emprendists lur savida dal rom e da l’autra vart vegnan ils future-skills sco cooperaziun, communicaziun, creativitad e pensar critic promovids. En il fratemp essan nus represchentads en tut las regiuns dal Grischun».
Xy, scolara da la 4. classa da xy tira il suandant facit: «Jau m’interessesch fitg per chaussas tecnicas, perquai che cun quellas sun jau occupada in’urella. Nus construin in plunader a motor, che po ir si e giu cun la furtga e che poi ir. Il lutegiar pretenda per exempel bler concentraziun, perquai ch’ins po sa brischar svelt. Cunquai che jau stoss reparar mezza mes termagls, sai jau dentant co che quai va.»
Prof. dr. Gian-Paolo Curcio, rectur da la SAP dal Grischun, accentuescha: «Cun l’emna da MINT dal Grischun svegliain nus tar var 200 uffants e giuvenils l’interess per ils cuntegns da MINT. Ensemen cun l’economia empruvain nus cun questa cooperaziun da far frunt a la mancanza da persunas spezialisadas. Quai che ha cumenzà pitschen po oz vegnir numnà cun 16 manaschis in’istorgia da success. Forsa sa decida in u l’auter per ina professiun da MINT.»
Durant l’emna da MINT dal Grischun vegnan uffants e giuvenils instruids en ils differents lieus da las interpresas sco er a la Scola auta da pedagogia da studentas e students da la SAP dal Grischun e d’emprendistas e d'emprendists dals manaschis d’emprendissadi correspundents ed introducids en il mund da la tecnica. La mesadad da las plazzas è mintgamai reservada per mattas.
ulteriuras infurmaziuns
Cun la promoziun da MINT prenda la Scola auta da pedagogia dal Grischun en mira che persunas d’instrucziun futuras sco era talas cun experientscha enconuschan las novas tecnologias, las san applitgar ed utilisar en l’instrucziun. Las scolastas ed ils scolasts vegnan entusiasmads per cuntegns da MINT ed acquistan abilitads da promover questas cumpetenzas da lur scolaras e scolars.
ulteriuras infurmaziuns
La SAP dal Grischun dat novs impuls cun il MINtmobil e punctuescha uschia sia rolla sco pioniera en il chantun Grischun areguard la promoziun da persunas d'instrucziun, scolaras e scolars en ils roms da MINT. Ella visita las classas directamain al lieu.
ulteriuras infurmaziuns
Wissenschaftliche Mitarbeiterin III, als Leiterin MINT
Ihr Browser (IE 11) ist leider zu alt und wird nicht mehr unterstützt.