Als campiunadis svizzers a Lai ha Selina Egloff cuntanschì il sensaziunal terz rang suenter ses comeback en las cursas da skis. Co che la scolasta futura e sportista d'elita Selina Egloff metta il studi ed il sport sut in tetg, tge che motivescha la sportista cun success e tge finamiras ch'ella ha, raquinta ella en l'intervista cun Lilian Ladner.
Sco sportista d'elita èsi necessari da lavurar cun cleras finamiras, e quai a moda focussada e disciplinada. Jau pens ch'i saja impurtant pli tard en la vita professiunala da pudair sa concentrar sin l'essenzial.
Tge munta quest success a la fin da la stagiun suenter tes comeback en il sport da skis?
Igl è stà fitg bel da pudair terminar la stagiun cun ina plazza da podest als campiunadis svizzers. Suenter ina stagiun cun oravant tut cursas en l'exteriur, giaud jau mintgamai fitg da pudair terminar la stagiun a chasa.
Ditg sincer; n’ha questa prestaziun sensaziunala betg era fatg surstar tai in pau en tia stagiun da comeback?
Cunquai che jau era pulit stancla, igl era ina stagiun intensiva, hai jau vulì giudair l’ultima cursa da questa stagiun per lura pudair partir cun in bun sentiment al trenament da stad. Da far quint cun insatge è fitg difficil en il sport da skis. Tants facturs ston constar per pudair far duas bunas cursas. Jau fatsch dentant adina mes pussaivel ed emprov da mussar mia prestaziun a las cursas. Tant pli bella è lura stada questa terza plazza da podest.
Quest gieu a chasa è segir stà insatge spezial per tai?
Dapi in pèr onns n'hai jau betg pli fatg cursas en il Grischun. Jau hai giudì fitg da pudair star sur notg a chasa e d'avair in curt viadi. L'atmosfera a Lai è stada grondiusa ed jau hai bleras bellas regurdientschas dal temp da giuventetgna en quel lieu, perquai che nus avain fatg bleras cursas là.
Sinceramain, hai era dà in curt mument trist ch'i n'ha betg tanschì per la segunda u l'emprima plazza?
Natiralmain ch'ins vuless adina anc dapli sco sportista. Jau hai fatg intgins sbagls en mia cursa che m'han custà temp. Uschia hai jau dastgà esser cuntenta cun mia rangaziun, malgrà ch’i m’ha grittentà d’avair fatg quests sbagls. Da l'autra vart sun jau engraziaivla d'esser arrivada saunamain en l'arrivada suenter la davosa cursa.
Tge spetga uss sco proxim?
Suenter ina pausa da trenament da duas emnas cumenza per mai il trenament da stad. Quel poss jau concepir pli individualmain ed absolver per gronda part a Cuira. Uschia poss jau ussa puspè ma concentrar dapli sin il studi a la SAP dal Grischun e ma preparar entir ed entratg per ils examens da semester.
Tge è tia proxima finamira persunala?
Sco proxim vuless jau ma focussar sin ina buna basa en il trenament da stad. La fin da fanadur 2024 vegn jau puspè a cumenzar il trenament sin la naiv. Mia finamira è da ma meglierar pass per pass e dad esser sauna e plain plaschair per la chaussa.
Co reusseschi a tai da metter sport e studi sut in tetg?
Cunquai ch’ir cun skis è in sport che pretenda blers e lungs viadis n'èsi betg adina simpel da coordinar sport e studi. La SAP dal Grischun pussibilitescha a sportistas e sportists d'elita ina preschientscha obligatorica pli pitschna. Tuttina èsi ina sfida enorma da pudair absolver ils dis da preschientscha pretendids, cunquai che nus essan adina en viadi da l'avust fin l'avrigl. Grazia a la plattafurma d'emprender ed a mias cumpognas e mes cumpogns da studi èsi pussaivel da prender suenter la materia manchentada per pudair dumagnar cun success ils examens.
Enconuschan las scolaras ed ils scolars la skiunza da cursa Selina Egloff en il praticum?
Sche jau fatsch in praticum en mia patria, l'Engiadina, capita quai ch'ils uffants m'enconuschan. Da mai na ma dun jau mintgamai betg d'enconuscher e sun simplamain la "studenta Selina Egloff". Ma sch'ils uffants fan dumondas, respund jau gugent quellas.
Tge porta il sport a tai per tes studi e per tia professiun futura sco scolasta?
Sco sportista d'elita èsi necessari da lavurar cun cleras finamiras, e quai a moda focussada e disciplinada. Jau pens ch'i saja impurtant pli tard en la vita professiunala da pudair sa concentrar sin l'essenzial. Plinavant sun jau persvadida che jau sun buna da pudair intermediar il plaschair d'emprender e che jau poss era mussar als uffants ch'i vala la paina da vulair sa sviluppar vinavant cuntinuadamain.
Datti parallelas tranter ils dus munds differents, il sport ed il studi?
Per mai èn il studi ed il sport d'elita dus munds magari differents. E tuttina è l'engaschi ch'ins sto purtar cun sai, la disciplina e la stenta da sa meglierar permanentamain insatge che collia omadus munds.
Tge è fitg impurtant per tai persunalmain?
A mai statti fitg a cor d'absolver ina scolaziun sper il sport. Che jau poss absolver quella a la SAP dal Grischun a moda parallela appreziesch jau zunt fitg. Gia ditg eri cler per mai che jau vuless gugent lavurar sco scolasta e grazia a questa pussaivladad da cumbinar il studi e las cursas da skis vegn jau uss in pass pli datiers a questa finamira.
Vulais Vus promover ed accumpagnar uffants da la scolina fin en la 2. classa? Sco persuna d’instrucziun gidais Vus ils uffants da sa sviluppar tenor lur preferenzas. A la Scola auta da pedagogia dal Grischun emprendais Vus co elavurar cuntegns da maniera didactica e co stgaffir in’atmosfera positiva en stanza da scola.
ulteriuras infurmaziuns
Sco scolast/a dal stgalim primar instruis Vus uffants da l’emprima fin sisavla classa. Vus stgaffis chaschuns d’emprender cun las qualas las scolaras ed ils scolars pon sa sviluppar da maniera optimala. La Scola auta da pedagogia As prepara sin l’instrucziun en tut ils roms dal plan d’instrucziun e pussibilitescha d’applitgar models teoretics da maniera pratica.
ulteriuras infurmaziuns
Ihr Browser (IE 11) ist leider zu alt und wird nicht mehr unterstützt.