Structura
Las studentas ed ils students absolvan praticums ed acquistan enconuschientschas en la didactica dal rom ed en scienzas d’educaziun. Communablamain cun las studentas ed ils students vegn examinada la qualificaziun professiunala.
La mesadad da l’emprim semester è deditgà a la pratica professiunala. Las studentas ed ils students instrueschan u en lur atgnas classas u en classas attribuidas. Planisar, reflectar e valitar l’instrucziun da maniera communabla collia la teoria cun la pratica. Impurtants temas da las scienzas d’educaziun sustegnan quest emprim pass en la vita professiunala.
Durant il segund semester acquistan las studentas ed ils students cumpetenzas da la didactica dal rom – tut tenor rom da studi a Cuira u a Son Gagl. Il medem temp cuntinueschan las studentas ed ils students lur invista en la pratica professiunala.
Durant il segund onn cuntinueschan las studentas ed ils students ad approfundar lur enconuschientschas en la pratica professiunala ed en las scienzas d’educaziun e collian consequentamain la teoria cun la pratica.
Il terz semester è anc ina giada deditgà al barat tranter pratica professiunala e scienzas d’educaziun. Las studentas ed ils students instrueschan u en lur atgnas classas u en classas repartidas. Planisar, reflectar e valitar l’instrucziun da maniera communabla approfundescha ils connexs tranter pratica e teoria.
Durant il quart semester acquistan las studentas ed ils students ulteriuras cumpetenzas da la didactica dal rom – tut tenor rom a Cuira u a Son Gagl. Las studentas ed ils students cuntinueschan ad approfundar lur enconuschientschas da la pratica professiunala. Plinavant cumenzan els lur lavur da master.
Durant l’ultim onn da studi vai per la sintesa da quai che las studentas ed ils students han emprendì fin uss. En il praticum final ed en la lavur da master mussan els co ch’els san colliar teoria e pratica en l’instrucziun.
Las studentas ed ils students s’approfundeschan da maniera intensiva en singuls champs da la pratica professiunala, visitan e s’engaschan en scolas specificas e reflecteschan anc ina giada impurtants temas da las scienzas d’educaziun.
L’ultim semester è deditgà a la lavur da master ed eventualmain ad in ultim bloc da la didactica dal rom. En il rom da colloquis survegnan las studentas ed ils students sustegn da docentas e docents per lur lavur da master. En l’ultim praticum mussan els ch’els èn bain preparads per l’instrucziun sin il stgalim secundar I.
